S’adaptar, tornar inventar, rebombir. Despuish quasi un an, lo monde de l’audiovisuau e de la cultura, com la societat sancèra, qu’a de compausar dab aquestes mots. Dab ua tresvirada de la nosta faiçon de tribalhar, que ns’a calut juntar las nostas fòrças dab associacions, estructuras, partenaris, entà contunhar de har víver la cultura nosta. Tribalhar amassa, per auherir au public concèrts, contes, lecturas, danças, escambis, de faiçon virtuau, dens ua temporada escura.

Qu’avèm coprodusit d’emissions dab Accents du Sud (Hestiv’Òc Fait son Show), Menestrèrs Gascons (Sautejada numerica) et lo CIRDOC – Institut Occitan de Cultura quan los lors eveniments estón anullats. Que’ns triga, com a tots, que los eveniments e posquian tornar préner. Mes lo succès d’aqueth tipe de format nos conforta dens la conviccion que l’aviéner dens l’audiovisuau se harà per partida de faiçon digitau, numerica, entà pertocar un public desmultiplicat. Amassà’s, segur, mes tanben perpausar la possibilitat de participar a distància.

« Distanciat » qu’ei aquera navèra rubrica, que pren en compte lo hèit que l’audiovisuau ensaja de trobar de solucions entà har víver d’eveniments que se pòden pas mei debanar de faiçon fisica. Distanciat qu’ei la faiçon audiovisuala de remplaçar çò presenciau.