Seleccionar una pagina

Tòca-Maneta

0 |

Lo jòc-vidèo a l’E3 : un pè dins l’economia, l’autre dins l’art

Crèdit fòtos : Copyright © 2017 – ESA Entertainment Software Association

Chaspaires de maneta, picanhaires de botons, balhaires de jòia a stick e esportius de canapè, adiussiatz !

L’automobila a son salon, l’agricultura a son salon, fin finala tot çò que pesa un pauc dins l’economia a son salon, mescla entre rencontres professionals e animacions publicas. Lo jòc vidèo fa pas excepcion, amb mai d’un salon de renomada internacionala, mas un en particular subrenada, e senhoreja : l’E3 (Electronic Entertainment Expo) de Los Angeles.

Perque òc, lo vidèojòc es la primièra industria culturala del monde, pas mens. En chifras en tot cas. Per vos situir, representa financiàriament dos còps l’industria cinematografica… e vos gausi pas dire ont n’es lo mercat del libre. Mas un còp qu’avèm parlat de chifras, que nos demòra ? Darrièr la dardena tindanta, ont s’amaga la cultura ?

Es benlèu tot lo paradòxe de l’E3, capable a l’encòp de presentar son subjècte jos la forma de lindes grafics vestits d’un vocabulari start-upesc positiu, coma per las lagremas d’un pichon creatiu qu’accedís a la reconeissença de sos pars e de las referéncias artisticas del mitan.

Sul catalòg presentat a l’E3 ongan, i a plan de causas de reténer, e de tota mena, qu’anóncian çò que serán las praticas vidèoludicas de l’annada a venir. Al mitan de las incontornablas seguidas de jòcs a succès, coma God of War o Far Cry 5 trobam un nòu Assassin’s Creed, la sagà istoricò-esoterica en monde e epòca dobèrts, que se debanarà aqueste còp en Egipta antica, una situacion sedusenta. Trobam tanben dos jòcs de piratariá a mai d’un, Sea of Thieves e Skull and Bones, e qualquas gròssas novetats, coma Anthem e sa rica planeta de sèlva salvatja, un Dragon Ball Fighter Z de tria pels amators de castanha, Days Gone e son monde pòst-apocaliptic poplat de zòmbis, un Spider-Man filmic, un Super Mario Odyssey leugierament alucat, tantplan coma un improbable rencontre entre lo plombièr e los “Lapins Crétins” que daissa pressentir de fòlas seradas entre amics.

Tot aquò son pas que de gròssas produccions, mas s’i presentèron de causas mai confidencialas e çaquelà interessantas : Ori e Life is Strange, seguidas de polits primièrs opusses, The Last Night e son ambient Blade Runner, la dessenada aventura musicala The Artful Escape, Cuphead e sos grafismes escapats dels dessenhs animats Warner de las annadas 30, A Way Out, ont cal cooperar per se sortir d’una preson, Ooblets, mena de Pokemon poetic e repausant, Vampyr, d’inspiracion neò-gotica…

Mas soi quasi-segur que l’anóncia que marquèt lo mai l’E3 2017 foguèt la de Beyond Good & Evil pel francés Michel Ancel que, aprèp 14 ans d’espèra, mostrèt un jòc qu’un primièr numèro aviá pas que daissat entreveire : un monde entre Valerian, Lo 5en Element, Enki Bilal, clafit d’umor, de creativitat, de bonas idèias, d’una libertat immensa. Semblariá que çò qu’Ancel ensaja de crear es ren de mens qu’un jòc d’exploracion espaciala ont se pòt sautar d’un planeta a l’autre, visitar de ciutats despaisantas, amb un scenariò arrapaire, en soma lo sòmi de tot jogaire. Que i arribe o pas (comença juste lo desvolopament), Ancel a çaquela ganhat l’escomesa de susprene, de provocar l’estrambòrd e l’espèra.

La mena de liuç de creativitat benvenguda dins un mèdia sul camin d’una cèrta normalizacion.

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blós !

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !