Road trip dens l’America daus filmes e de las serias
Se coma jo, n’avetz pas de passapòrt, ni de moneda o de temps per anar taus Estats Units d’America aqueste estiu, vos perpausi de los visitar amassa en tot s’estar a casa !
Lo poder internacionau daus Estats Units n’es pas solament una question economica o politica ; es tanben una question de soft power, un concèpte inventat prau professor de Harvard Joseph Nye en 1990, qu’es a díser lo poder per una entitat politica d’influenciar las gents d’un biaish indirècte, per exemple per la difusion de produccions culturaus, coma daus films e de las serias, qui avaloran un mòde de vita especific e ne hèn una mena d’estandard culturau internacionau. Pr’amor de Hollywood, Netflix e tot aquò, coneishem tot·as daus païsatges emblematics daus Estats Units, qui son probablement lo país lo mei conegut visuaument dens lo monde !
Se una seria se debana a Seattle – per exemple, Grey’s Anatomy – segur que’s veirà la Space Needle, una tor qui’s sembla a un OVNI. Estó construsida en 1962 per una Exposicion universau. Ac sabètz ? Seattle es la capitala de l’estat de Washington, de non pas con·hóner dab la capitala daus Estats Units, Washington D.C. (District of Columbia)!
Lo Midwest es l’endret perfèit per encontrar un tuaire en seria : vos poirà perseguir capvath los milhocars o vos atacar dens vòste chalet dens los bòscs a costat daus Grands Lacs on degun ne vos poirà pas enténer cridar…
Be i a tròp de filmes e serias qui’s debanan a Nòva York per que posqui estar exaustiva aquí, mes pòdi totun mentàver Sex and the City, Friends, Brooklyn Nine-Nine, How I Met Your Mother… La « Gròssa Poma » es sovent representada per Manhattan, un daus 5 boroughs (districtes) de la vila, situat sus l’isla eponima, e on se tròban tots los gratacèu coma L’Empire State Building e lo Chrysler Building, la borsa de Wall Street, lo Metropolitan Museum of Arts, Broadway – l’avenguda coneguda per sas comedias musicaus – e Central Park. Accedissem a l’isla per un daus 13 ponts que descobrissem en vista aeriana a cada còp qu’un personatge arriba en vila dens un taxi jaune ! Dens lo Marvel Cinematic Universe, la Tor Stark/Avengers se tròba a Manhattan, mes mei recentament, la seria Miss Marvel se debanè dens la comunautat musulmana de la vila de Jersey City, de l’aute costat dau flume Hudson.
La Califòrnia qu’es l’estat modèrne e progressista per excelléncia ! Qu’i hè tostemps beròi, lo monde i tribalhan dens la tech o lo cinèma e i a Disneyland ! Quan èri adolescenta, mon prumièr imatge mentau de l’America èra lo pont dau Golden Gate a San Francisco, qui’s pòt véder dens cada episòdi de la seria Charmed, dens daus travellings aerians sus hons de musica populara après lo generic de debuta. Podem tanben véder lo pont penjant roge long de mei de 2500 m dens X-Men, la luta ultima, on Magneto lo desplaça entà que sons mutants poscan accedir a un laboratòri sus l’isla d’Alcatraz.
Se vos agradan lo poquèr, lo blackjack o las maquinas de jogar moneda, ne cau pas mancar Las Vegas ! Aquera vila qui ne drom pas jamei se tròba au bèth miei dau desèrt de Mojave, lo mei sec dau país, a 200 miles dau Grand Canhòn. Mes mèfi ! Se seguissetz dens lo desèrt un personatge encontrat a la debuta de l’episòdi, es probable que vos abandone au bèth miei daus cactus ! En marchar de cap au sud, lhèu que trobaratz un motel o un diner sus la mitica Rota 66, que seguín mantun bordèr entà migrar en Califòrnia pendant la Granda Depression dens las annadas 1930.
Solide, mantun filme e seria se passan dens la capitala, Washington D.C. S’i debanan totas las intrigas politicas – que pertòquen lo president a l’Ostau Blanc, o lo Congrès au Capitòli ; dens l’estat vesin, la Virginia, se tròban tanben las sedenças dau Despartament de la Defensa (lo Pentagòne), de la C.I.A. (a Langley) e de l’Acadèmia dau F.B.I. (a Quantico). En aumenatge au prumièr president, Georges Washington, bastín en 1885 un obelisc haut de 169 m, lo Washington Monument, qu’escala l’òmi-aranha (o puslèu lo gojat-aranha ?) dens Spider-Man: Homecoming entà sauvar sons amics. Mes mèfi, las serias pòden estar mensongèras ! Per exemple, l’Institut Jefferson de la seria Bones n’existís pas, mes es inspirat de la Smithsonian Institution !
