Twitch : segre lo corrent

Mas nos fau benleu començar per lo començament e explicar Twitch a los e las qu’an jamai agut l’ocasion de se trobar a espiar un « raid » mancat sus League of Legends o una amusanta partida d’Among Us a una ora avançada de la nuech…

Twitch quò es un servici de difusion de video en directe (autrament dich de « streaming »), creat a la debuta per segre las gròssas competicions de juec video o alara difusar de las partidas a un comitat mai restrench. Twitch es pas solet a perpausar quò : daus concurrents coma YouTube o Facebook permeten tanben de streamar daus juecs. Mas Twitch es segurament, per lo moment, lo mai complet, emb sos sistemas de chat (discussion en directe), d’abonaments que donan drech a de las recompensas especialas, de « punts de chadena » per mercejar los e las que demòran fideus a un creator de contengut… E quò a pas eschapat a Amazon, que n’es proprietari dempuei 2014 !

Apres quauquas annadas, Twitch a començat de far venir de las personas que son pas a fons dins lo juec video, que se son pusleu botadas a dessenhar, bastir de las maquetas, adobar lur veitura o nonmàs platussar en directe. Çò qu’es presat dins Twitch quò es l’interactivitat, los eschamges emb una comunautat mai o mens larja, tanben de se filmar en far quauquarren qu’auriam fach de tota faiçon, entau, per veire. Forçadament, una pandemia es passada per aquí, e lo streaming es vengut per totplen de gents una possibilitat de gardar contacte emb lo monde maugrat l’embarrament e la soletat. E, dau còp, twitch.tv es vengut la radio de los qu’escotan pas la radio, o la television de las qu’avisan pus la television : quò es, parier, possible de chamjar de chadena, de zapar, de far quauquarren en mesma temps o au contrari de s’investir e de participar, segon son temps e son enveja.

Emb tot quò, daus medias dichs « tradicionaus » an començat de se virar vers Twitch. Lo mai emblematic quò es segurament Samuel Étienne, animator de Questions per un Champion sus França 3 per los vielhs e d’una revuda de premsa sus Twitch per los jòunes. Daus medias d’informacion l’an seguit, puei de las personalitats politicas, que s’i fan convidar coma se farián convidar au jornau de TF1.

Vesem aquí las limitas de l’ustilh : la lenga complicada d’un politician pas tròp abituat a se far polhar per dau monde que li responden còpsec rentra en oposicion emb lo mòde dau chat qu’es mai directe ! Sens comptar que los medias an tendéncia de transpausar sus Twitch lurs còdis abituaus, regdes, quilhs que fan justament que lur viram de mai en mai l’eschina quand los vesem sus la tele dau salon…

Quò es malaisat de saber çò que i aurá après quela mòda, mas quò es segur que per subreviure sus Twitch e s’i far sa comunautat faudrá jugar emb los còdis de la plataforma : de l’originalitat per se destriar, de la regularitat per fidelizar, e, segur, pas aver paur de se lançar, sus quau subjècte que quò siá, mai benleu en occitan !