Novèl Almanac setòri 2022
Çò qu’aviá desaparegut pòt renàisser. E qual reviscòl ! L’Armanac cetòri èra un monument de la literatura populara de la vila maritima, escanat per la guèrra de 14. Mai de cent ans aprèp tòrna, a las colors de 2022, engimbrat pel Ceucle occitan setòri. Cal pas tròp comptar i crosar los Sants, nimai i trobar lo calendièr de las fèstas, e rai de tot aquò. Tornam a un essencial fornit e rensenhat, amb la volontat fèra de daissar la plaça a la paraula liura e a la cultura viva, qu’aquò siá en francés, en occitan, o dins un saborós barrejadís. En aquò es plan un almanac, passam d’una lenga a l’autra, d’una pluma a l’autra, d’un registre a l’autre, sauticam naturalament de l’Istòria a la musica, la literatura, las arts, los espòrts tradicionals ; la cultura populara, la sapiéncia del monde, es pertot presenta, las voses se ligan e se desligan, esboçant dins un retrach polifonic una vila d’influéncias mescladas e del còr bategant. La fòga dels convidats es comunicativa, e dona enveja de descobrir Seta lo libret jol braç coma s’èra un guida toristic, sabent sens èsser sabentàs ! Causida sensibla pels tempses que vivèm, aquel almanac celèbra l’acuèlh de totes e totas los e las que bastiguèron e abitèron la ciutat, de personatges colorats que, sovent, venián de luènh. Aprèp d’elements de fonologia « tradicionals » dins un tal obratge, çò consacrat als Italians venguts de Calàbria amb lor(s) dialècte(s) fa lèu compréner que tenèm aquí un obratge rare, e polit amai (la maqueta es de l’artista Rodín Kaufmann, la cobèrta d’Alain Delmas). E encara, tot i cabiá pas çò ditz Miquèla Stenta, presidenta del Ceucle Setòri. Lèu un almanac per 2023 ? Res sembla pas impossible, amb una ciutat d’una cultura tan rica nos disèm que se pòt cavar pus pregond encara per far sortir tota la saba e la sabor !
