Seleccionar una pagina

Tòca-Maneta

0 |

Nintendo, la cultura e lo culte del retrogaming

Crèdit fòtos : Copyright © Freepik – Background

Chaspaires de maneta, picanhaires de botons, balhaires de jòia a stick e esportius de canapè, adieussiatz !

Amic legeire, amiga legeira, recòrda-te, lo còp passat dins ton Tòca-Maneta mai aimat parlèrem de l’estonant revirament indie de Nintendo, es a dire de l’interès un pauc novèl de Big N concernissent los pichons jòcs independents, un interès qu’èra en trin de pagar, e coma cal, per una entrepresa qu’a patit darrièrament de qualques problèmas e de qualques fracasses. Marcam se vos plai qualques segondas de silenci e ajam una pensada esmoguda per la Wii U, enterrada abans d’aver viscut plenament.

En tot cas, de tot lo temps pres a escriure aquela cronica passada, gardavi en cap que lo succès actual de Nintendo se basa sus doas articulacions, ligadas entre elas tanben : lo jòc independent, çò qu’es novèl per eles, e tanben los jòcs ancians, çò que sonam lo « retrogaming ».

Cal dire que en çò de Nintendo an totjorn capitalizat sus lors ancians succèsses, de còps fins a n’agotar tota la sal. I a pas un Mario Kart que sortisca sens aver una bona part de circuits que son de rechucadas de circuits d’ancians Mario Kart, quand lo jòc permet pas dirèctament de jogar a l’anciana, en 2D, grafismes pixelizats e musica monofonica.

E ben figuratz-vos qu’ai una còla d’amics que me coneisson plan e que m’ofriguèron, a l’escasença d’un eveniment que mencionarai pas tant es dolorós a mon arma encara jovenòta, la Super NES Mini, benlèu mai coneguda en França coma Super Nintendo, mas aquí en una version modernizada, capabla d’afichar quicòm sus las televisions de uèi. En fach es un emulator modèrne que sembla una consòla anciana (la Super NES es sortida en 1991) : es pas possible d’i botar de cartochas que los jòcs i son embarcats, los pòrts maneta son diferents, la consòla es mai pichona e mai leugièra…

En question de refonda totala d’una consòla pel sol plaser d’aflatar nòstra fibra nostalgica, Nintendo (que jos-tracta) n’es pas a son primièr còp, qu’avián ja realizat una NES Mini.

E de qué i trobam dins aquela vièlha-nòva consòla ? Mai que mai de produccions de l’ostal, 21 jòcs per nos far dire e pensar a qual punt Nintendo sabián far de jòcs. Soi quitament pas ironic aquí, es una realitat. Per un Mario Kart òrre e complicat de jogar ara quand n’avèm de miraudioses a disposicion, trobam de pepitas intemporalas coma Street Fighter 2, Donkey Cong Country, Super Mario World, Zelda : A Link To The Past, Super Metroid, Yoshi’s Island, Secret of Mana… E i a quitament de suspresas de còps : suspresa de véser que Starfox, jòc de batalha espaciala ont los vaissèls enemics èran sonque de formas geometricas (per rasons tecnologicas) dona encara de bonas sensacions de vòl, suspresa de descobrir EarthBound desconegut en Euròpa a l’epòca e que sembla estranhament a un jòc independent de uèi dins son anar (e sos grafismes), suspresa de s’apercebre que tot èra d’una dificultat tarribla !

Aital, Nintendo amb sa seleccion (coma es un emulator, es possible d’apondre d’autres jòcs, mas es forçadament al limit de la legalitat, mai foguèsse d’una simplicitat ridicula) se cultiva l’imatge d’una bóstia que sap fabregar de jòcs, e dempuèi bèl temps, dinamita las criticas qu’acompanhèron las sortidas de sas 2 darrièras consòlas de salon (Wii, mas non) e se quilha coma l’entrepresa qu’a a l’encòp la legitimitat de l’istòria darrièr ela e l’uèlh benvolent e complasent pels pichons faseires de uèi. Podèm espepissar l’estrategia de totes costats, es infalhible !

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blós !

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !