Seleccionar una pagina

Critica musicala

0 |

Ministèri del riddim

Dins la galaxia de la musica d’expression occitana (e dins mai d’una lenga, sovent bilingua o trilingua e mai) i a de perlas raras, d’experiéncias que s’ameritarián d’èstre ben mai conegudas. Aqueste estiu, a l’Estivada de Rodés, èran programats lei MC’s tot terrenh dau Ministèri del riddim. Leis esperaviam, gaujós de saupre qu’anaviam dançar sus un balèti electric de la mòda jamaïcan-occitana, mai la chavana crebèt lo cèu lampejant e lo concèrt fuguèt anullat.

Èra sensa comptar amb la determinacion dei sordats dau raggà qu’improvisèron un « dancehall » dins lo corredor de dintrada de la sala dei fèstas (amb la participacion dau Minvielle !) : la pròva bèla de l’eficacitat d’aquesta musica, capabla de s’adaptar a totei lei situacions, un vertadier folclòre dins lo sens « estrict » dau tèrme !

Ministèri del riddim son tres : dos cantaires, Sil Hocine e Mouradikal, e un DJ, Mehdi, ai platinas. La recèpta es simpla e clara coma l’aiga dei rius de la montanha negra onte creissèt Hocine : fargar un sound system, animar lei partidas sus de bòn reggae tot en desvelopant una pensada rica e coerenta. Es la tradicion dau « conscious lyrics » eiretada de la Caraïba tant coma de la granda epòca de la « Linha Imaginòt ». Nos demandam sovent onte es la seguida, après Massilia, lei Fabulous, Nux Vomica…

Es que tota aquesta escòla musicala e filosofica saupèt transmetre sei basas ?  Ministèri del riddim n’es una respònsa ! Lo discors anti-centralista, pluricultural, la vèrva e lo vèrs impertinent, la bassa que te pren au ventre : tot i es. E ges de postura « artistica », ges de volontat de far « carrièra », mai puslèu una vida, un esperit mes au servici d’una musica que li es naturala, evidenta.  Lei lengas, arab, berbèr, occitan, francés, se mesclan e dison lo mond d’uèi, la vòlha de viure e d’amassar lei gents, dins la jòia e l’intelligéncia dau collectiu. Un pichòt disque sortiguèt en 2015 (amb de versions creadas per DJ Kafra), e esperam lo novèu amb impaciéncia ! D’aquí lai, retrobaretz lo ministèri ai quatre cantons d’Occitania, lo mic a la man, dins l’experiéncia fisica dau balèti. Es aquí qu’aquela musica tròba tota sa plaça. Sil Hocine es lo MC occitan lo mai rapide e precís que se pòsque trobar, Mouradikal es un pielon, una valor segura, que pòu desplegar son flow d’oras e d’oras… Lo duò fonciona a plen regime, abrivat per lo mix implacable de Mehdi. Son energia es comunicativa, virala e fa un ben fòu de prene en plena figura una paraula occitana portada per leis enfants d’immigrats de la segonda generacion. Vaquí lei trobadors dau sègle XXI, aquelei que sabon jogar ambé lei mòts e faire lusir e petejar la lenga, coma un fuec que belugueja. Dins sei bocas, la paraula es una matèria fabulosa, una pasta que se chaspa, se modela, se trabalha per donar de sens e de fòrça. La fòrça de se téner drech, urós de saupre que tot un « ministèri » òbra au quotidian per lo plaser de nòstreis aurelhas e de nòstrei cambas.

Patwa

Ministèri del riddim

Rub a dub
Ministèri del riddim
Ministèri Prod, 2015

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !