Seleccionar una pagina

Barrutlatges

0 |

La bauma Chauvet o Cauna dau Pont d’Arc (Ardecha)

Un barrutlage, un viatge, es un desplaçament fisic dins l’espaci, mai es tanben una exploracion dau temps, una atraversada de l’espessor dei sègles e dei millenaris que marquèron la ròca, la seuva, lei sèrres o lei traças umanas de’n pertot presentas. Caminar dins un luec es tanben dintrar dins la complexitat de son esséncia, faire l’experiéncia unica de sei riquesas inagotablas. En resson, per exemple, au trabalh de Serge Pey evocat dins aqueu Diari, podèm dire qu’es un biais de legir lo monde que se desplèga coma un poèma sensa debuta nimai fin. Dins Ardecha, sus lo site de Valon Pont d’Arc, après aguer fach abstraccion de l’invasion toristica estivenca, es possible de sentir aquela « multi-dimension » d’un païsatge.

I a, primier, l’òbra d’art naturala, la beutat bruta e evidenta d’aqueu grand pont de pèira que sauta la ribiera : lo pont d’Arc. Es un bauç immense (l’arca minerala fa 55 mètres de naut e 60 mètres de larg) que foguèt cavat per lo trabalh pacient de l’aiga. L’endrech es pivelant : lei corbas d’Ardècha, la corba dau cauquier que careça lo cèu, tot sembla d’èstre arribat, lentament, a un ponch d’equilibri perfiech. Non luenh d’aquí, dessota lo ròc dich « d’Abraham » naisse una espeluca descobèrta en 1994 onte nòstreis avis de la preïstòria laissèron un testimòni d’una valor inestimabla : un milierat de pinturas e de gravaduras vièlhas de mai de 30 000 ans. Es dificile de s’imaginar l’emocion d’una descobèrta tala : l’aparicion, subran, au lume dei frontalas, d’un tropèu de bisons en plena corsa… o la vision, tremolanta, de la fresca dei lions, desmesurada… Sola una ponhada de scientifics astrós aguèron e an encara la possibilitat de visitar la bauma, barrada au public per sa sauvagarda. Pasmens l’experiéncia es possibla, amb aqueu torn de fòrça arquitecturau que representa la replica de la cauna : au site dau Razal, sus la rota de Sant Remèsi.

La visita de la replica es estonanta tant lo trabalh de reconstitucion foguèt menimós e capitat. Lo planestèu dau Razal, au bèu mitan d’una eusiera que tuteja lo cèu, es un luec requist, amb una vista granda sus lo massís de Tanarga que senhoreja sus lei castanhedas ardechesas. Aquí tanben, faudrà saupre escapar a la fola e venir fòra sason, per poder saborejar la passejada dins lei corredors sorns fins ai dessenhs enfachinants. Ambé de linhas d’òcra roja o de carbon negre, leis òmes de la preïstòria tracèron d’una man segura e inspirada lei contorns d’un bestiari fabulós, aprofichant l’irregularitat dau supòrt (lei rebombs e lei corbas de la ròca) per donar vida e movement ai representacions. La mestresa es totala, la resulta es d’una fòrça e d’una beutat trebolantas. Aquelei dessenhs servats ais entralhas de la tèrra nos tòcan en plen còr e fan espetar la vièlha teoria dau progrès… La primièra vertadièra òbra d’art coneguda au monde es bensai una dei plus bèlas… L’experiéncia es pasmens permesa mercés ai tecnicas lei mai modèrnas que s’acarèron a reprodusir la quita espeluca dins cada detalh, ambé la mendra concrecion. L’illusion es perfècta, coma portada per la fòrça originala dei representacions preïstoricas.

Avant la sortida, auretz de mau de quitar lei darriers panèus onte rinoceròs, vacas e lions s’entremesclan dins una dança espectaclosa. Mai longtemps la corsa dei cavaus sauvatges ressonarà dins vòstra tèsta : es ben aquí, dins la bauma de l’esperit uman, que paisson aqueleis animaus d’en delai deis atges.

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !