Seleccionar una pagina

Critica musicala

0 |

Mapamusicamonde – Alteritat e apropriacion culturau

Viatjar dab vosauts, car·a·s lector·a·s, de cap ad aqueths país deu continent american que desvelha ua hami d’encontre e d’alteritat. Las aurelhas musicairas que son tostemps curiosas e en cèrca de mascadura tà’ns neurir, hà’s suspréner e crear. La tentacion b’ei grana de dialogar, bastir palancas, e bahida mesclà’s, har « fusion ». Ritmes qui’s semblan, melodias espigadas, Istòria comuna, mots qui soan e amian emocions, evocacions e reclams d’imaginaris, eca… Fretà’s a l’alteritat, òc, mes tà trobar la soa expression pròpia, vertat ? Lo viatge interior d’ua vita sancèra.

Lo movement de protestacion deu « Black Lives Matter » qu’avia ua presa de consciéncia deus privilègis ligats a l’aparéncia fisica, mes tanben a la cultura, a la lenga, a la religion, e aute. Un gran camin de deconstruccion e de descolonizacion que’ns aten. Lo « mestissatge », absurditat biologica entaus scientifics, qu’ei ua tentacion artistica e culturau generalizada. La termièra b’ei prima dab l’apropriacion culturau, qui ei ua « fòrma d’opression e de spoliacion » segon Wikipedia : « la cultura « minoritària » que’s trobaré atau despolhada de la soa identitat, o redusida a ua simpla caricatura racista ». Abraçar ua cultura que’s deveré companhar d’avisà’s deus qui la pòrtan, la hèn, la víven, d’avisà’s deu privilègi d’aver accès ad aquera cultura, e d’estar liure·a, per exemple, de desplaçà’s preu territòri son. La grana popularitat de las musicas deus Balcans n’an pas tirat los Ròms de l’estatut de pàrias. Los elements de la cultura afroamericana, recuperats per la cultura mainstream mondializada, ne hèn pas empach a las violéncias e murtres racistas. L’exotisme que hè véner, l’exotisme que tua. Lavetz, quin celebrar, inspirà’s, religà’s, shens estar pilhard ?

Tà justificar las nostas existéncias en resisténcia, e lo hèit de har soar d’autas lengas suu sòu de l’Estat francés, nosauts occitans que sortim sovent la carta deu suberlocau, enrasigat e ubèrt, qui parla a l’universau. Que lutam contre la dominacion d’ua lenga sus l’auta, d’ua cultura sus l’auta, contre lo rotlèu compressor de l’uniformizacion. Lavetz, quin poderem parlar de musica latinoamericana ? O de musica africana ? Un sol mot-continent tà resumir ua infinitat de pòbles, lengas, culturas ? Seriosament ? E tolerarem lo tèrme de « musica europèa » o « musica blanca » o « musica francesa » tà’ns definir ? E tà inspirà’s d’ua musica qui’ns hè vibrar dens las nostas practicas, quin ns’ac apoderar shens pilhar ? On s’acaba lo torisme musicau e on comença la world music ecoresponsabla recebedera ? Qué apartien a qui ? Quin s’aquesish la legitimitat d’ac jogar ?

Preu camin aqueste, que s’i encontra a l’autor e filosòfe Edouard Glissant, qui pòrta vias de responsa dab lo concèpte deu « Tot-monde » qui « pensa l’interpenetracion de las culturas e deus imaginaris » : « lo Tot-monde que designa la copreséncia navèra deus èstes e de las causas, l’estat de mondialitat dens lo quau dauneja la Relacion. » Enter aqueths archipèls de territòris connectats, los viatges, las migracions e las diaspòras que vienen tornar bàter las cartas. Tà musiquejar amassa, assajem las valors de basa, com lo respècte, lo curiosèr e l’umilitat. Tienem-nse luenh deu viste hèit, de l’a-pus-près, deu simplificat, de la mediocritat. Quauquas pistas de bon aplicar a las nostas culturas e lengas pròpias, en passant.

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !