Los camps estelats del jòc vidèo
Los camps estelats del jòc vidèo
L’espaci nos fa pantaissar dempuèi fòrça temps. Cal dire que son gigantisme representa un camp de possibilitats gaireben infinit. Del libre de Jules Verne De la Terre à la Lune a la cançon Walking on the Moon de The Police sens doblidar la seria dels filmes Star Wars o mai recentament Interstellar, l’espaci se tròba pertot dins la cultura populara ; es doncas normal de trapar tanben de videojòcs sus aquò.
E son pas a datar de la velha ! Podèm considerar qu’un dels primièrs videojòcs sus l’espaci es Spacewar!, en 1962, qu’opausa dos jogaires que devon destrusir l’astronau de l’autre en tot far atencion als asteroïdes. Mas de segur que se parlam d’ancians videojòcs sus l’espaci, son las maquinas d’arcada Space Invaders, Asteroïds o Galaga las primièiras a nos venir en cap. Totas prepausan mai o mens lo meteis principi, perque son totas de shoot’em up (comprendre : « tirar sus tot »), es a dire de tirar sus d’OVNI siá amb una astronau, siá amb un canon. Space Invaders en 1978 pòrta la nocion de defensa e de davalada dels enemics fins al pè de l’ecran, Asteroïds en 1979 tòrna préner lo concèpte de trucada amb l’environa, e Galaga en 1981 permet de mestrejar doas astronaus a l’encòp. Es normal de trapar fòrça videojòcs sus l’espaci a aquel periòde perque sèm alara en plena represa de la Guèrra freja e de la corsa a l’espaci. Entre autres jòcs mitics, avèm la seria Starfox qu’es un rail shooter en 3D ont devèm abatre los enemics davant nosautres per poder caminar, o la dels Metroid ont seguissèm las aventuras de Samus Aran, una caçaira de primas, entre fasas de plataformas e TPS (jòc de tir en vista a la tresena persona).
Metroid : Zero Mission (Nintendo)
Astroneer (System Era Softworks)
Mas los videojòcs espacials se son pas contentats sonque dels jòcs de tir, trapam tanben de jòcs d’accion-aventura. La doas serias màgers dins lo genre son Halo e Mass Effect. Halo nos fa incarnar un Spartan (un supersoldat) que defend l’umanitat contra lo Covenant (d’extraterrèstres). Dins Mass Effect (la seria principala, pas sa seguida Andromeda), salvam la coalicion espaciala formada per l’umanitat e d’autras raças d’aliens de maquinas gigantas chafradas « Meissonièrs ». Se volèm tornar mai luènh dins lo temps, podèm dire que DOOM, malgrat qu’es a l’origina d’un RPG (jòc de ròtle), se viu coma un jòc d’accion-aventura ont devèm progressar de basa espaciala en basa espaciala (Titan, Jupitèr, Mars…) per tampar de portals de l’infèrn e arrestar una invasion de demònis.
Pels jòcs d’estrategia, podèm citar notadament Galactic Civilization o Sins of a Solar Empire mas podèm desviar cap a un sosgenre particular de jòcs d’estrategia, los RTS (estrategia en temps real) amb Starcraft.
De segur, i a encara tot un molonàs de jòcs que ne poiriam parlar ; Surviving Mars per la gestion, Eve Online pels MMO (jòcs en linha), Astroneer (monde dubèrt), Elite Dangerous (que servís a la recèrca) o encara l’ambiciós Star Citizen, totjorn pas acabat… Mas ieu, per clavar, aimariái vos parlar d’un jòc simple mas pas simplòt que se sona Tharsis. Dins aquel jòc, menatz una expedicion mandada cap a Mars mas res se passa pas coma previst. Es doncas un jòc de gestion de crisi, amb un pecic d’aleatòri perque tot i es decidit per de dats, çò que li balha un pichon costat jòc de platèu.
Starfield ()
