Un estiu d’imatges 2024
Julhet. Bilanç d’un estiu sus lei plataformas, dins lei salas puei dins lei festenaus de Gard. Projeccions a l’ostau e defòra.
A l’ostau
Max
Ambe l’estiu, espelís la plataforma d’estreaming Max ; es vista sus lei malhums coma una novetat. I retrobam pasmens lei serias classicas HBO : Six Feets Under, Games of Thrones, Euphoria e ne’n passe. E dire que i a de gents que son estrambordats perque i vesèm l’integrala Harry Potter ! Basta… Reste sus la reserva quora sabe que lei sotatítols en VO son absents sus d’unei projèctes. Un non-eveniment doncas que nos farà tornar sus Netflix, ARTE ò la comerciala Prime qu’a una programacion interessanta a l’ora d’ara.
A l’ostau
La Reina Jana
D’efiech, a mon grand espantament, Prime fa fòrt ambe Lady Jane, una seria produsida en America de Nòrd e Anglatèrra. Lo racònte trantalha entre cònte medievau e fantasia fantastica. Uech episòdis otranciers (umor anglés obliga) sus de musicas pòp anacronicas. Es epic. Tracha de subjèctes que son de mòda : identitat, feminisme, racisme, transgenre animau e au mitan de tot aquò l’istòria parodica dau tròne d’Anglatèrra que doas reinas se disputan. Un buf d’èr freg que vos fau pas mancar. My Lady Jane. Sus Prime. Una capitada reiala !
My Lady Jane
Gemma Burgess e Meredith Glynn, 2024
De veire sus Prime
Dins lei salas
Arizona Dream
Tòrna sortir lo grand filme popular de Kusturica dins lei salas bèlas. Un tractament en 4k que nos fa apreciar mielhs lei paisatges glaciaus dau Grand Nòrd e aquelei d’Arizòna. A pas cambiat l’istòria : un pantais amorós (a cinc) bailejat per un balon ò un peis volant. Leis estèlas son au rendètz-vos : Faye Dunamay, Vincent Gallo, Lili Taylor e Jerry Lewis lo bèu, lo grand, dins un ròtle seriós de vendeire de belei veituras. A ! Es lo reviscolament de nòstra jovença tre lo generic ambe la cançon escricha per Goran Bregovic e Iggy Pop : In the Deathcar. Lo filme data de 1993 saique e siam urós de retrobar Johnny Depp jove. Mai pataflòu ! Qunta decebuda ! Qu’es longàs ! E mai se vòlan lei personatges, lo filme s’escranca sota lo pes deis annadas passadas. Fin finala, ne’n demòra coma una desillusion amorosa après doas oras trenta de projeccion. Adieu Arizona Dream ! Adieu pantais d’Arizona ! Adieu jovença !
Arizona Dream
Emir Kusturica, 1993
Version 4k 2024
Dins lei salas
Lo Comte de Monte-Cristo
Le Comte de Monte-Cristo es dins lei salas. Polida adaptacion populara e seriosa dins sei fons verds, sei decòrs reciuclabes (la caforna de carton servirà tanben de castèu dau tresaur, sembla), e sa musica de microordenador per Windows 95. Lei drònas fan ben son òbra per una carteta de Marsilha dins son chuc, Marsilha sens accent (fau pas desconejar) e Marsilha de sei vestits d’epòca ben proprets proprets. Avisa-te qu’amb aquelei temps conservadors, avèm besonh d’un cinèma classic a la papà. Es pas mòrt lo cinèma francés ! Es pas mòrt Alexandre Dumas ! Es pas mòrt Denys de La Patellière ! Reviscòla lo Comte de Monte-Cristo !
Le Comte de Monte-Cristo
Alexandre de La Patellière e Matthieu Delaporte, 2024
Dins lei salas
Kinds of Kindness
En sala. Es una faula en triptic. Lo realizator Yorgos Lanthimos deçaup, franc de la forma ambiciosa e estetizanta de son projècte. Presentat a Cana, siam ben d’acòrdi pasmens ambe lo prèmi d’interpretacion masculina d’un Jesse Plemons que se transmuda tal un Mala dins Capitani Flame dins tres racòntes dispariers. L’actritz Emma Stone senhoreja un còp de mai mai lo filme corau cabussa dins la complexitat de sei scenaris.
Kinds of Kindness
Yorgos Lanthimos, 2024
Eveniments gardonencs
Universitat occitana d’estiu e La Vau
L’estiu comença fòrt ambe la presentacion dau documentari de Patrick La Vau : Cèu e tèrra durant l’Universitat occitana d’estiu de Nimes. Lo retrach de Dòna Reina Rabòt, lo personatge principau, dins una campanha en guèrra, pivela leis espectators. M’avise dei benfachs de la projeccion publica que lo filme l’aviáu descubèrt en DVD. Dins la sala nais la comunion. Òm cacalassa tre lei promierei sequéncias quora la mamet, lo personatge principau, s’ensaja au paracasuda. Ven l’esmai puei : la mamet charra de son passat istoric e engatjat. S’alucan lei lumes. Lei questions fusan. Lei reaccions son tras que positivas fàcia a un filme que pensave pas aisit-aisit d’accès.
Lo cèl e la tèrra
Patric La Vau, 2023
Eveniments gardonencs
Una sala sota leis estèlas
Nimes ven una discrèta mai importanta ciutat de cinemà, l’estiu. En julhet, nos agrada de nos passejar au vilatge dau Fòrt Vauban per lo festenau Une salle sous les étoiles : cada vesprada, rendètz vos tre sièis oras trenta ambe leis estanquets dei jòcs, lo mercat deis artistas e dei creators, lo dobloton (doblatge de filmes en dirècte). A uech oras ven lo concèrt e lo grand filme quora tomba l’estelum. La beguda es fòrça simpatica e la programacion de qualitat.
Eveniments gardonencs
Una realizatritz dins la vila
En julhet a Nimes es lo ciucle Une réalisatrice dans la ville. A la fònt de Nimes, i un ecran cauquier que fa de lum blanc coma de papier. La convidada ongan es la discrèta mai fòrta Emmanuelle Bercot qu’es espantada per lo succès dau cinèma en plen èr dins Gard. Lausa la realizatritz l’eveniment a gràtis per totei, dins un jardin incomparable, lo jardin de la fònt, susvelhat ambe benvolença per l’agach de la torre Manha. Que venga la raissa cevenòla, leis espectators restan tancats a sei cadièras sota leis uelhs dei ciunes blancs sus fons negre de l’aiga dei bacins : vòlon veire lei filmes ! De presentacions se fan tanben au cinèma de la ciutat e aquí tanben, çò insistís la realizatritz, la sala nimesenca es clafida. Podèm i descubrir ò reveire leis òbras d’Emmuelle Bercot : Elle s’en va, La Tête haute, La Fille de Brest, De son vivant. Quora la qualitat cinematografica es au rendètz-vos s’i tròban lo monde. Festenau cinematografic. Una realizatritz dins la vila. Jardins de la fònt. Fin julhet. Nimes.
Eveniments gardonencs
Festenau dau cinèma bèlga en garriga
La programacion dau Festival du Cinéma belge à Nîmes et en garrigue tòrna ambe sei seradas trash, sei documentaris, sei cauquilhatges e filmonets, la nuech dau rire, lo karaoké en viu de Manjes pas lo micrò, lei sesilhas dei pichons, lo torneg de petanca francobelga e lei concèrts a l’auba. Festenau dau cinèma belga en garriga. Fin julhet. Garriga e Senta Olha (Gard).
