La Pharmacie
La Pharmacie
Hélène Carrère d’Encausse ven de morir, lo dissabte 9 d’agost de 2023. Èra nascuda lo 6 de julhet de 1929. Èra filha d’una familha de la nauta noblesa de l’empèri dels tsars de Russia. En 1917, los « Zorabishvili » perdèron tota lor fortuna materiala e s’exilièron en França. Pichoneta, ambe lo papà e la mamà parlava rus. Pus tard, quand serà venguda una personalitat celèbra, li arribarà d’èsser recebuda per Vladimir Potin (o « Pótin » segon l’accentuacion russa) e de parlar dirèctament en lenga russa ambe lo « president de la federacion de Russia », quand èra encara un cap d’Estat respectable.
Aquela femna èra una istoriana brilhanta. En 1978 publiquèt son libre pus conegut : L’Empire éclaté. En 1990 foguèt elegida a l’Academia francesa que ne venguèt « le secrétaire perpétuel » (teniá a l’emplec del masculin, en bona lenga francesa, per tot nom de foncion). En 2008, faguèt a l’Academia francesa un discors ont reconeissiá ben que « La France est le pays de la diversité des hommes et de la culture », mas aquò l’empachava pas de s’opausar a çò qu’apèlava « La tentation de faire entrer les langues régionales dans la Constitution ». L’escotèron pas. L’article 75.1 foguèt ajustat al tèxte de la Constitucion de la Republica francesa : « Les langues régionales appartiennent au patrimoine de la France. »
Ambe una « secretària perpetuala » coma ela caliá pas esperar cap de refòrma de l’ortografia del francés. Aquela lenga demòra la sola, demest las lengas neolatinas a aver pas simplificat encara los grafèmas d’origina grèca. Aicí la lista d’aqueles sèt grafèmas :
1 — La cronologia – La chronologie.
2 — L’omeopatia – L’homéopathie.
3 — L’anfiteatre – L’amphithéâtre.
4 — La farmacia – La pharmacie.
5 — La rapsodia – La rhapsodie.
6 — Lo teatre – Le théâtre.
7 — Lo dinamisme – Le dynamisme.
Lo comble es l’incoeréncia que fa escriure « théâtre » mas « trône ». La grafia etimologica seriá *thrône.
La nòrma grafica occitana, simpla, modèrna e panlatina, s’opausa a la nòrma grafica francesa, estupidament complèxa, incoerenta e arcaïca.
