Dins nòstre Diari de l’estiu passat, un “Especial Jòcs” encara dins totas las ments per la frescor de son originalitat (vanta-te bartàs…), una pagina centrala destacabla (una primièra !) prepausava un concors, si-ben, demandant als participants e participantas de retalhar lo nòstre Danièl Lapatana e las siás afétias, de lo vestir, de lo colorejar e de lo metre en situacion, pausat coma cal.

Bon, èra l’estiu, fasiá caud, èran las vacanças dels pichons, aviatz oblidat lo numèro a la plaja, benlèu vos passèt ensús. Se jamai aquò vos ditz pas res, aquela matèria jogabla sagelada “Lo Diari” es dempuèi la Nadal liurament descargabla aicí.

En tot cas de personas se’n sasiguèron e ne faguèron quicòm ! Demest aquò quatre classas de primari que, coma volèm pas decebre degun, premiam totas a egalitat ! Totes los participants-ganhants recebràn d’aicí qualques jorns un presenton plan especial… Volètz saber çò qu’es ? E ben aviatz pas que de jogar quand èra temps, macarèl !

Sens transicion, las participacions dels dròlles e de las dròllas de Tolosa, Montpelhièr e Losèra, òsca a ele·as per la participacion e, plan sovent, l’imaginacion !