Caçaire x Caçaire
Partir a l’aventura a l’atge de 12 ans amb solament una cana de pescar e de determinacion ! Aquò’s susprenent ? E ben, es aquò que presenta Hunter x Hunter, un monde ont existís lo mestièr dels vòstres sòmis. S’i ganha de glòria, d’argent e de coneissença !
Dins aqueste manga seguissèm Gon, un jove protagonista que vòl realizar sos sòmis, tornar trobar son paire, qu’es el meteis un celèbre Hunter. Al fial de son epopèia va far lo rencontre de fòrças amics fadats amb d’istòrias e d’objectius diferents, coma per exemple véncer un gang ! L’anime s’acompanha de fòrças scènas de castanha contra d’adversaris badass e estranhs coma una palhassa sadica, un assassin amb de clavèls sul cap tot drech sortit d’Hellraiser o encara lo bòsso misteriós d’una banda de psicopatas.
Hunter x Hunter es un manga de Yoshihiro Togashi paregut pel primièr còp en 1998 e que contunha totjorn, amb a l’ora d’ara 36 tòmes. Es un manga de tipe shōnen amb un peçuc de fantasiá, l’autor i inventa sa pròpria escritura e i dessenha sa pròpria carta del monde. Hunter x Hunter es pas lo primièr manga de Yoshihiro Togashi qu’aviá dejà conegut lo succès amb doas autras òbras emblematicas : Level E (1995) e Yū Yū Hakusho (un autre shōnen de 1990). Puèi lo manga a conegut doas adaptacions en anime, una en 1999 que pas jamai foguèt contunhada, e una autra en 2011 qu’es en pausa pel moment (que se tròba uèi aisidament sus Netflix), mas qu’a vertadièrament donat un buf novèl al manga.
L’anime a la fòrça d’aver de personatges atrasents e dinamics que demòran pas aquí sens bolegar e qu’evoluisson de longa. Emai Gon siá lo personatge principal, es pas lo mai interessant perque es acompanhat de fòrças protagonistas desparièrs e carismatics coma Killua que fugís sa familha d’assassins e tanben sas pulsions murtrièras, Leolio que vòl utilizar son estatut de hunter per una causa altruista, Kurapika qu’es animat per una set de venjança. Lo personatge de Gon es qualqu’un de brave e innocent e l’autor se servís de sas caracteristicas per aumentar los traches macabres dels antagonistas. De tal biais, trobam Hisoka, un clown dangierós que vòl solament lo jòi d’un combat.
L’anime se bastís d’arcs narratius totes plan diferents dins sos contenguts e que s’atardivan pas dins sos sicuts. Los episòdis son cargats en accion e eveniments. Dins HxH, los univèrs càmbian, los personatges passan d’un examèn enigmatic a una venta a l’enquant descabestrada, e duscas a integrar un videojòc subresofisticat. Brac, HxH agradarà als gostes de totes los lectors sens jamai vos aconsomir. De mai, lo manga abòrda de tematicas pas totjorn enfantinas tant coma l’abandon e la mòrt. Hunter X Hunter es un manga qu’a pas jamai paur de cambiar radicalament son encastre d’un arc a l’autre en parlant alara de totes los subjèctes.
Amb sos 23 ans d’existéncia, encara que Hunter x Hunter demòre dins l’ombra d’autres mangas prestigioses, lo cal considerar coma un manga important perque a sauput ligar mantunas generacions de lectors.
Armand, Perrine e Amandine del licèu Sòlt de Masamet
