Seleccionar una pagina

Clinhada

0 |

Fèliç Daval e lo Carladés

Fèliç Daval e lo Carladés

un escrivan en son terrador

Estatua del papa Gerbèrt - DDP/Unsplash

Lo Carladés es un pichon país dotat d’un ric patrimòni que s’espandís sus l’adreit dels monts del Cantal mas que penètra tanben sul departament vesin d’Avairon. Un país abeurat per las vals prigondas de la Cèra, del Gol o de la Bròma. Dins lo Cantal aquò representa 12 comunas e dins Avairon 6, lo genre de país que figura pas vertadièrament sus las cartas administrativas, mas qu’existís realament, tant per son paisatge e sa cultura coma pel caractèr de sos abitants. Un còp èra tèrra de burons, aquel país pichon es ara una jòia toristica.

Lo Carladés, pròche vesin de la vila d’Orlhac, existís tanben per sa literatura, es d’alhors la sorga d’inspiracion màger de l’òbra de Fèliç Daval. L’escrivan originari de Badalhac s’apoderèt l’arma d’aquel territòri e l’istòria de sa familha e las transformèt en matèria literària per dos romans, Les Fraisses èran tombats (1981, tornat editar en 2009), Las Vaissas avián folhat (2009) e un recuèlh de novèlas, Les Òmes de l’ecir (1987), dont una de las istòrias, Paure Baptista, venguèt un cort metratge gràcias al realizator Gérard Roussiès. Aqueles racontes romanesques que s’espandisson sus quasi trenta ans son ancorats dins lo Carladés ; « se vòles parlar del monde, parla de ton vilatge » auriá escrit Leon Tolstoi, atal l’òbra de Daval pòrta aquela nocion d’universal. S’i sentís la mutacion d’un territòri rural, lo passatge d’un mond a l’autre. S’i pausan las questions de l’identitat, de la modernitat o del racisme. Los personatges, totes inspirats per las gents del terrador, ni idealizats, nimai folclorizats, los a inventats a partir d’una matèria viva plan reala. Cossí parlar melhor d’un país qu’en utilizant lo lengatge de sos abitants ? Los dos romans daissan una plaça granda als dialògs, permetent al legidor de s’impregnar d’aquela lenga, aquel dialècte nòrd-lengadocian, lenga mairala de plan de personatges e del quite autor.

Fèliç Daval a tanben consacrat una partida de sa vida a escriure de contes e de poèmas, çò qu’es gaire estonant quand se sap qu’aquel admirator de Bodon es sortit d’una familha de contaires. Dins sa lenga mairala foguèt breçat pels contes de son paire, lo quite el o foguèt per aqueles de son pepin. Transmetèt sa passion a sos escolans quand èra professor de las escòlas dins los vilatges del Carladés e professor d’occitan al licèu d’Orlhac.

Dins, entre autres, la Legenda del bèl Ramèl (1994) e La Legenda del grand Guindon (1993), dos racontes empreses de poesia, de meravilhós e de magia, mòstra l’amor que pòrta a las gents e a las bèstias del seu país. Lo buron e la companhiá de las vacas, an totjorn avivat son inspiracion.

Fèliç Daval es tanben un passionat d’occitan, foguèt un professor « militant », que transmetèt a sos escolans una lenga rica e autentica. Sus aquela tèrra ont lo Felibritge joguèt un ròtle plan important dins sa joventut, participèt als combats de sa generacion en essent un dels pionièrs de l’aventura de l’IEO Cantal o de la Calandreta del Vernhat.

Totas las òbras de Fèliç Daval son disponiblas a la librariá Découvertes Occitanes. Bona lectura !

La Legenda del bèl Ramèl

Fèliç Daval
Edite-moi, 2014
Occitan/Francés
40 paginas – 21 x 21 cm – 20 min 39 s
ISBN : 979-10-92382-12-9
12€

La Legenda del grand Guindon

Fèliç Daval
Edite-moi, 2013
Occitan/Francés
36 paginas – 21 x 21 cm – 20 min 39 s
ISBN : 979-10-92382-01-3
12€

Les Òmes de l'ecir

Fèliç Daval
IEO Edicions, 1987
Occitan
136 paginas – 18 x 11 cm
ISBN : 2-85910-052-0
9€

Les Fraisses èran tombats

Fèliç Daval
Ostal del libre, 2009
Occitan
248 paginas – 18 x 11 cm
ISBN : 978-29-14662-123
15€

Las Vaissas avián folhat

Fèliç Daval
Ostal del libre, 2009
Occitan
224 paginas – 19 x 12 cm
ISBN : 978-29-14662-130
14,50€

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.