Un estiu occitan ric
Produccion audiò visuala associativa en occitan
Tè Vé Òc, que son prètzfach es de pegar tant coma possible a l’actualitat occitana, serà present de segur dins lei manifestacions grandas de l’estiu de 2018.
Aquò se dubrís en fanfara amb lo Forum Euroregional au Pont de Gard : « Culturas popularas en dialòg ». Nos farem lo resson d’un programa dedicat ais actors dau dialòg culturau entre Pirenèus e Mediterranèa.
Farem tanben un reportatge sus l’Estivada de Rodés que recampa cada an una chorma granda a l’entorn dei concèrts, conferéncias e animacions divèrsas.
Viuretz puèi lei Rescontres de Provença, organizats per l’IEO Provença Còsta d’Azur en julhet.
Amy Cròs
Contunharem de segur de testimoniar de la vida culturala e economica occitana, e en agost, vos prepausarem de tornar veire quatre emissions causidas dins la tièira d’aquelei de 2018 que fuguèron mai presadas. Cerieisa sus lo pastisson, veiretz lei tres corts metratges realizats en occitan amb lei collegians d’Ambrussum (Lunèu 34) : escolans de Catarina Dufour, e aquelei de Claudina Paul ai collègis de St Geniès de Malgoirès e Brinhon (30). Un trabalh bèu de transmission e de creacion a l’encòp. Per acabar, descubriretz un clip promocionau per lo CFPO : « L’òc uman », que filmèrem a partir dau scenari bastit per leis estagiaris.
Rendètz-vos sus http://www.teveoc.com/ e abonatz-vos a nòstra cadena youtube per èstre avisats dei sortidas sul net cada setmana :
https://www.youtube.com/channel/UCqg4iwctGoCthnrhFUUP0A?view_as=subscriber
Bon estiu !