Transmission de la lenga
Tè Vé Òc seguís de pròche tot çò que toca la transmission de la lenga d’òc. Dins lei emissions recentas avèm mes en evidéncia tot lo trabalh fach per d’occitanistas dins diferents cantons d’Occitania granda, que per nautrei Occitania se limita pas a la region actuala Occitania !
Amb l’emission « L’espaci occitan deis Aups » realizada per Amada Cròs, vesèm coma lei sòcis òbran per mantenir la preséncia de la cultura d’òc dins son locau fondat per l’IEO 04/05 a Gap. De permanéncias son asseguradas amb la venda de libres e de musicas, lei seradas animadas e un site ben referenciat. 700 comandas partiguèron en 2018 dins lo monde tot.
Puèi fuguèt realizada per Lisa Gròs l’emission « L’occitan en Auvernha ». Permetèt de veire comunicar un collegian, ex-calandron de Carcassona, e la presidenta de l’IEO 63, autora e contaira. Dos dialèctes particulars e una intercompreneson perfècta entre leis entrevistats. Leis abonats de nòstra cadena youtube an fòrça presat de leis escotar.
Enfin, es a Nimes que Tè Vé Òc a filmat la passejada literària dei professionaus dau libre que recampèt 300 calandrons d’Agde e de Nimes. Entendre leis enfants parlar una lenga bèla es un plaser grand que partejaràn aquelei que regardaràn l’emission realizada per Miquèu Gravier.
Toteis aqueleis accions participan regularament a la defensa e la promocion de l’occitan dins un periòde qu’es fòrça menaçat ! Nos sembla bòn de lei faire veire.
