Seleccionar una pagina

Tòca-Maneta

0 |

QUAND L’ISTÒRIA RENCONTRA LO VIDÈOJÒC

Episòdi 1 : Una debuta complicada

Chaspaires de manetas, picanhaires de botons, balhaires de jòia a stick e esportius de canapè, adieussiatz !

Uèi vau començar una seria de cronicas sus un tèma qu’es de mòda, per una convergéncia de sortidas e d’interès variats, mas es pas perque fasèm una cronica en occitan que podèm pas èsser de mòda, saique : l’Istòria e lo vidèojòc.

Dos domenis qu’aguèron de debuts amassa un bricon complicats. Forçadament, 20 ans i a, l’imatge del vidèojòc èra encara marrit, acusat qu’èra de decerebrar la joventut, de servir a pas res, d’èsser un jos-mèdia e pas exactament de cultura. Urosament, sens qué gausariái pas vos prepausar aquela cronica regulara, aquò cambièt un pauc a flor e a mesura dels ans e de l’interès general pel videoludisme.

Dins aquelas annadas, se trobèron çaquelà de monde per sasir la caravana al passatge en se disent que, dins aquel ocean de mediocritat – çò pensavan – èra a eles de redreiçar la barra e d’educar las massas popularas en se servissent d’aquela aisina epileptogèna e abrutissenta que se i fa « Pau ! Pau ! » de totes costats. Caricaturi un pauc, rai, mas amb lo recuol, i a de còp que me disi que soi pas forçadament tròp alonhat de la realitat de çò que se mormolhèt dins los estudiòs a l’epòca.

E aquò nos donèt tota una tropelada de jòcs sagelats per exemple « Réunion des Musées Nationaux » : Egypte, Chine, Versailles… Pas forçadament marrits, que l’aspècte istoric èra aprigondit, ensajavan de mesclar una intriga (en general policièra) a una epòca donada per fin de far engolir al jogaire un maximum de donadas scientificas… un pauc estofagarri, qué. Per plan se rendre compte de çò que podiá prepausar lo vidèojòc, caliá aver accès a d’autras produccions a costat. Ailàs, qualques parents, pauc al fial o refregits per çò qu’ausissián d’idèas recebudas e de clichès, gausavan pas sortir del sagelatge ministerò-scientific que lor garantissiá la bona consciéncia que, quitament darrièr son ecran, la drollatalha anava aprene de causas… e se far cagar coma cal.

Èra pas ganhat, qué. Plan segur, aquel contacte demest los primièrs entre l’Istòria e lo vidèojòc es de tornar botar en contèxte : rufe, brut, entièr, èra la resulta fin finala pro naturala del rencontre primadièr entre doas disciplinas qu’aprenián tot bèl juste a se conéisser. Uèi encara, ensagi d’èsser pas tròp sevèr amb aquelas temptativas, e ne gardi un remembre amusat, fauta d’èsser nostalgic.

Es que sens tota la seguida de jòcs « ludò-culturals » coma se definissián a l’epòca, especialitat notadament de l’estudiò francés Cryo Interactive (França es un país de musèus, caliá plan qu’aquò servisca), auriam pas agut tot çò que venguèt aprèp en tèrmes de jòcs que fan se costejar aventura, enigma e Istòria, la Granda e las pichonas entremescladas, a començar per la seria mai famosa a l’ora d’ara per aquò, d’origina francesa ela tanben, aquela de Assassin’s Creed ? La question se pausa.

E la filiacion es benlèu pas dirècta entre Cryo e Ubisoft, qu’entre la fin de l’un e la començança de l’autre passèron dètz ans – una eternitat dins l’industria videoludica – que dins aquel brieu espeliguèron d’autres apròchis de l’istòria per lo jòc, amb qualques bravas capitadas e qualques fracasses pas tant braves. Mas vos contarai aquò lo còp que ven !

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blós !

Laissar un comentari

avatar

This site uses Akismet to reduce spam. Learn how your comment data is processed.

  Soscriure  
M'assabentar quand

M’aboni !

Anóncia

Compte-rendut: Lo Diari, vòstre vejaire nos interèssa !

Los darrièrs clips

Cargament...

La letra del Diari

Los darrièrs comentaris

    Soscrivètz a nòstra letra d'informacions !

    Soscrivètz a nòstra letra d'informacions !

    Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

    Avètz soscrich amb succès !