Seleccionar una pagina

Deu neient ençà

0 |

Lo Broishèr – Episòdi 5 : Ça-vietz gwentejar !

Lo Broishèr

Episòdi 5 : Ça-vietz gwentejar !

Ahuecats e Ahuecadas deu Diu Negre, un còp mei que ns’i tornam peu monde deu broishèr ! Mes ne s’i parlarà pas de maniganças e ni d’autes malastres. Non ! Que s’i parlarà d’un jòc de cartas ligat sancèr ad aqueste univèrs e qui coneishó ua escaduda de las granas per l’ambient deus ahuecats e ahuecadas de CD Projekt Red : lo gwent.

Çò qu’ei lo gwent ? Pausatz-ve en taula, lo Diu Negre que v’ac va ensenhar.

Lo jòc aperat gwent que hasó la soa aparicion per l’univèrs deu Lop Blanc au parat de las benalejas contadas au jòc The Witcher 3 : Wild Hunt (2015). Que s’agiva purmèr d’un jogòt entà completar los ambients deus estanquets. Imaginatz dus jogaires, cara e cara, estimant-se l’un l’aute, passant-se en revista las tropas abans la darrèra batalha. Pr’amor lo gwent qu’ei shens qu’un jòc de carta : ua vertadèra luta mortau !

En efèit, lo gwent que’s presenta com ua batalha redusida a un platèu de jòc, en un monde engatjat en un tarrible afrontament enter los reiaumes deu Nòrd e l’Empèri de Nilfgaard. Qu’i trobam donc tots los elements guerrièrs utilizats per Andrzej Sapkowski. Au purmèr reng, lo hèit que las cartas e son divididas per pièla, o decks, qui corresponen de plan aus belligerants deu conflicte : atau que notam la pièla nilfgaardiana, la pièla mostres, la pièla reiaumes deu Nòrd e fin finau, la pièla Scoia’tael (elf).
De mei, las cartas, enlà de la division per camps, que son partatjadas en mantun tipe. Infanteria, distància, arma de sièti, eròi, morau o enqüèra climat : ua vertadèra armadeta ! E taus qui’s pausarén la question, quiò, que i a ua carta Geralt !
Fin finau, lo platèu que’ns bremba sancèr un camp batalhèr en bèth presentar sheis linhas (tres contra tres), en plaçar l’infanteria davant, las armas a distància darrèr e las armas de sièti au cap deu platèu. Tot qu’ei en plaça donc entà aviar ua guèrra shens nada victima (se ne hèm pas compte de la dignitat deus perdents).

Mes quin hèm entà har au gwent ? Arren non n’ei mei simple !

Cada jogaire qu’a ua pièla de cartas mesclada per avança. Aquesta pièla non pòt pas estar consultada au parat de la partida, lo jogaire non pòt pas sonque préner las cartas tau com l’arriban. Ua partida de gwent que’s debana en tres torns. En aquestes tres moments, cada jogaire qu’a, en un nombre de torns limitats, a presentar suu platèu l’armada mei poderosa entà véncer l’adversari e panar la victòria. Mes avisatz-ve, ne s’ageish pas de pausar cartas, las uas per las autas, sus un platèu e addicionar las valors entà poder cridar vae victis ! Non ! Lo gwent qu’ei un jòc d’estrategia torn per torn e quan disen estrategia, qu’entenen tradidas, sosmaquèrs e gahatèrs.

E v’interèssa aqueste jòc de cartas ?

Lo Diu Negre que’vs conselha d’ensajar lo darrèr vadut de CD Projekt Red per l’univèrs deu broishèr Gwent : The Witcher Card Game (2018). Un jòc a gratís qui permet a ua comunautat de jogaires de s’i gahar beròi.

Lo Diu Negre que v’i espèra… entà har parlar las cartas !

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.