Seleccionar una pagina

Retrach literari

0 |

Auguste Fourès (1848-1891)

(1848-1891) – Un écrivain engagé dans son siècle

Auguste Fourès

Fourès es filh de Lauragués, mai particularament de Castèlnòu d’Arri, mas es tanben un òme que ten mai d’una cara.
Es primièr poèta (en francés, puèi en lenga d’òc), mas encara etnograf, politician local, jornalista, e enfin felibre mistralenc.
Sa vida corteta de 43 ans, plan emplenada, se pòt analisar de mai d’un biais.

Lo Felibritge

Fourès ne foguèt un membre actiu ; serà en aquò enrodat de son ainat Achille Mir (1822-1901) e de son cabdèt Gaston Jourdanne (1858-1905). Es aital que participa a las « grandas fèstas latinas » de Montpelhier (1878), abans de venir, aprèp una demission passadissa (1879), majoral en tant que « Cigala de la Libertat ».
Fourès es politicament « roge ». O assolida amb son amic Xavier de Ricard (1843-1911) e l’aventura de l’almanac de La Lauseta que coneitrà maites jos-títols significatius (Almanac del patriòta lengadocian, Publicacion de l’Aliança latina, Libreton dels Felibres republicans…)
Fourès ven puèi director del suple-ment literari de La Dépêche, Le Petit Toulousain (1885-1888) e lo mèstre d’òbra d’un recuèlh… en favor de l’Alsàcia-Lorrena (1884).
Serà un temps pròche del « Felibrige latin » a l’entorn de Charles de Tourtoulon (1836-1913) e de Louis-Alphonse Roque-Ferrier (1844-1907), promotors de la Revue des langues romanes, encara viva uèi.

L’Albigesisme

Son òbra es traversada d’una referéncia constanta a la cara de « l’Aujou », Napoléon Peyrat (1809-1881), pastor ariegés inventor del « mite de Montsegur ». Dins Les Cants del Soulelh (1891) (1), trobam dos poèmas caracteristics d’aquel engatjament :
A las mouliés que descluquèroun Mounfort, celebracion del 25 de junh que Montfòrt moriguèt al pè de Tolosa soslevada. (2)
Un Mounfort prussian qu’evòca en 1876 lo « bourrèu des Albigeses ».

 

———————————
1 – Réédités en graphie classique par l’IEO en 2015.
2 – Joseph Delteil, autre écrivain audois, marquait d’une croix ce jour chaque an sur son calendrier des Postes.

 

Lo Federalisme

Es la tresena referéncia màger de la pensada de Fourès. Prend sas rasigas dins lo tèxte de P. H. Proudhon, Du Principe Fédératif (1863), que serà mes en avant dins las annadas venentas per tot l’espèctre politic. Proudhon es citat dins La Lauseta de 1878, tanplan coma lo filosòf Charles Renouvier (1815-1903) de Montpelhier, autor d’un Manuel Républicain de l’homme et du citoyen (1848).

Lo federalisme es una doctrina que revendica l’autoorganizacion : de la comuna… a tota la tèrra ! L.-X. de Ricard ne serà el tanben un dels teoricians, çò que donarà en 1877 Le fédéralisme.

Los tèxtes de Fourès son alara plan dobèrts dins lor tòca. França i ten una bona plaça : un dels poèmas dels Cants s’entitola « A la Franço ! » : « O Maire, subre l’mounde alargos/ La santo Libertat que fargos… » ; celèbra tanben Mulhouse : « Toun cor que s’es dubert / Vès la belo patrio e vès la Republico ! ». Mas son còr a el se’n va, dins un poèma long, cap a « La Marianno latino, forto e bristoulado », « A Leucado » la grèca qu’evòca « la blanco Leucato al founs del Narbounés », cap a « L’Emir Okba-Ben-Hedjadj joubs la Tourre pinto » de Carcassona en 732… Mas encara « A la Roumanio », « Al troubaire rouman B. Alecsandri »…

Dins aquel concèrt internacional, caldriá çaquelà pas oblidar l’enrasigament dins lo campèstre, lo país, la natura… Que s’agisca dels poèmas (L’auta, La Segaira nuda, Le Cassoulet, Las dos fuelhos…) o de brocaduras especificas (La Gueuserie, Les Jeux des enfants du Lauragais, Potiers et poterie du Lauragais).

Los seguidors de l’òbra seràn Prospèr Estieu e Antonin Perbòsc, que s’encontraràn a sos obsèquis maçonics, mas tanben l’abat Josèp Salvat, que li consacrarà un libre entièr.

Vous souhaitez lire cet article en français ? C'est possible !

Lire l'article en français

A prepaus de l'autor

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !