San Salvador – La Grana Holia
Arrapatz-ve, 2021 qu’ataca hòrt, dab la sortida de la poderosa Grande Folie de San Salvador. Lo 22 de genèr, lo disc tan esperat deus sheis lemosins qui fòrman aqueth « còr popular deu Massís centrau » que sòrt en çò deus labèls Pias e Pagans. Adara coneishuts e reconeishuts preus emponts internacionaus, los sheis de San Salvador que celebran dab aqueth album un percors musicau ja esmiraglant. Ua grana holia, on la poténcia deu còr e de las singularitats e’s conjugan, qui apèra aus concèrts sudents e a las vibracions collectivas.
Figura de proa deu collectiu lemosin Lost in traditions, basat a Chamboliva en Corrèsa, San Salvador que hè partida d’ua comunautat artistica, qui teish locaument ua tarlaca pluridisciplinària. Joen·a·s eretèr·a·s d’ua cultura hòrta qui grasish d’un hons etnomusicologic hornit, los sheis de San Salvador qu’an ua istòria comuna e un rapòrt estrèit a l’eretatge deu territòri on s’ancoran. Lo pòst-rock qu’i vien puntejar lo nas, au demiei d’un sarròt d’autas inspiracions. Sortit d’ua serada desguisada qui’s seré acabada a la capèra deu vilatge, lo visuau deu disc que’s hè vuèita-graèr trufandèc e seriós au còp. Un clinhet, bahida, a l’apielatge de las influéncias qui’us bastishen, a l’eretatge abraçat puish enviat a pàisher, tà tornar cridar quauquarren mei. Tà portar aqueth album, qui parla, canta, crida en occitan, los de San Salvador qu’an causit un títol francés : la Grande Folie. Per tant qui ajan causit la lenga occitana, ne’n haràn pas un chivau de batalha. La lenga que’s hè mestior sonòra, vocau, musicau.
A la canta e a las percussions, que son tres hemblas e tres òmis : Eva Durif, Laure Nonique-Desvergnes, Marion Lherbeil, Gabriel Durif, Thibault Chaumeil, Sylvestre Nonique-Desvergnes. La Grande Folie qu’ei hargada de ueit pèças sortidas d’aqueth concèrt « radicau cantat a sheis votz, dus tòms, dotze mans e un tamborin ». Lo public assidú (vlòg de virada, concèrts, clips) que va arretrobar tròçs patinats chic a chic au briu de las viradas, e liurats aquiu en pregondor. Lo cant polifonic b’ei massís, dab armonias poderosas, d’on saben sortir timbres singulars, en sòlo, duòs, triòs. Los de San Salvador que ns’an acostumat·da·s a tròçs deus longs, qui prenen lo temps de desplegà’s en movement. Totun, lo cortet Fai Sautar qu’introdusish ad aquera virtuositat esberida. La Liseta que pren la seguida, dab catorze minutas d’ua longa passejada pr’un camin percussiu a progression subtila, atucolant-se enti’au capborrudèr. E bohar, enfin. La Grande Folie e Efans de la campanha, pleats d’ua densitat qui tien en alèrta, que possan entiò las ahitas l’exploracion vocau deu tèxte. Tau com ua coregrafia musicala, deu pagan au sacrat, l’interpretacion qu’ei d’ua grana precision dab ralentits escricats, frasats precís, rompeduras francas. Los silencis que suslinhan l’amplitud sonòra, ponctuan e mian de cap a d’autes univèrs. En aqueths temps d’embarrament, l’escota d’aquera Grande Folie que’s hè chorrèra de son organic e sincèr. Que torna urbir un imaginari vibratòri.
La Grande Folie
San Salvador
PAGANS / MDC / PIAS
22 de Genèr 2021
