Aquiu l’òra de la susmauta dab RAMONEURS DE MENHIRS !
Pas aisit de parlar d’aquestes ausèths de qui traucan lo cèu musicau dempuish un sarròt d’annadas, tant la loa òbra e’m pertòca lo còr e l’amna dab ua tribalitat unenca.
Los RAMONEURS DE MENHIRS que tornan aqueth estiu dab un quatau disc aperat Breizh Anok, de qui a la particularitat d’aver com convidat … lo Bagad Bro Kemperlé ! Vivòste !
Que calèva gausar, totun, d’invitar un quarantenat de musicians tradicionaus tad aqueth grop mes dàvit acostumat a l’estetica deus Bérus, e dab adobaments mes capvirats de cap tau punk. N’ei pas lo cas aquiu, e Breizh Anok qu’ei un vertadèr disc de musica tradicionau (tiò, Madama!), on la cantaira mitica Louise Ebrel, hilha de l’ua de las sòrs Goadec, e demora enqüèra e tostemps en prumèra linha entà cantar lo plinn dab los bardes bretons, a maugrat los sués 79 ans !
RAMONEURS DE MENHIRS que fot aquiu un gran còp de pè au cuu a Nolwenn Leroy e a Tri Yann, e aquò que’m hè gai, francament : que n’avem un sadoth de tot aquera clica, de qui escon drin l’empont navèth breton portat per grops de qualitat com Trouz An Noz, Pevarlamm, o Nolwenn Korbell, tà citar sonque eths !
Presents sus l’empont de la War Zone deu Hellfest aquera annada, Loran Béru, guitarrista deu combò, non manquè pas de parlar de las lengas de França dab aquera frasa : « bretons, basques, occitans, catalans, alsaciens, berrichons, corses : ensemble nous sommes de la dynamite! ».
Aquiu tanben un espiar sus las causas de qui’m platz, que sortim drin de l’egocentrisme e l’enjòc vertadèr de la nosta epòca qu’ei de combatejar contra la globalisacion, quin qué sia la cultura o la lenga.
Vadut en 2006, RAMONEURS DE MENHIRS que son ambaishadors atipics de la diversitat culturau, mes a maugrat lo temps de qui vira, eths que son tostemps aquiu, fidèus aus engatjaments moraus gahats a la debuta de las annadas 80 dab Bérurier Noir.
E aquò qu’ei rare quan òm vei quauques empachucs de qui viran la vèsta tà aver un ministèri o drin de picalhons !
La pèth deu diable, aquestes bretons !
