Lo Broishèr – Episòdi 4 : Sauvatja qu’ei la Caça
Lo Broishèr
Episòdi 4 : Sauvatja qu’ei la Caça
Ahuecats e Ahuecadas deu Broishèr, totun qu’i èm ! Sortitz la cervesa de Kaedwen, l’idromèu de Sodden e lo vin de Toussaint tanben ! Pr’amor, uei, lo Diu Negre qu’a lo plaser de’vs parlar de l’adaptacion referéncia de l’òbra d’Andrzej Sapkowski, la tresau produccion de l’estúdio polonés CD Projekt RED : lo famós, l’inenarrable The Witcher III : Wild Hunt.
Que torna sus las rotas lo Broishèr entà un viatge deus longs, per Novigrad e Wizimà, en quèsta de la soa mainada d’adopcion auherida per la destinada (que’vs brembam un broishèr qu’ei clec pr’amor de las mutacions) Cirilla Fiona Elen Riannon aperada Ciri.
Purmèr que vam dar un torn deu costat de l’istòria contada, pr’amor un còp mei, l’estúdio polonés que hasó la causida de préner pro de distància dab l’òbra d’Andrzej Sapkowski, qui espia la produccion aquesta, d’aulhors, com ua libra interpretacion de la soa epopèia. Ua causida d’adaptacion qui, per Diu Negre, ei paganta un còp mei.
Seguent l’intriga de l’adaptacion precedenta (The Witcher 2 : Assassins of Kings) qui dèisha lo broishèr en un monde abrasat per la guèrra contra Nilfgaard, The Witcher III : Wild Hunt, que’ns convida a descobrir un continent arroeinat peus conflictes guerrièrs com moraus. Un enviroament qui va travar beròi Geralt en las soas cèrcas. Mes entau broishèr, l’urgéncia n’ei pas lo conflicte, mes de retrobar Ciri abans la Caça Sauvatja : ua tropa fantomatica (a la mòda deus Cavalèrs de l’Apocalipsi) qui ei, era tanben, en cèrcas de la princessa. Interessada peus poders eretats per la gojata, aquera tropa que’s confirma mei dangerosa que los esquadrons emperiaus e que s’estarà l’antagonisme màger de l’arc narratiu. Aquera tension que plaça lo jogaire de cap a l’urgéncia. Ahiscats per l’ambient ansiós d’ua Mort qui arrodeja, qu’èm convidats a córrer aus darrèrs deu personatge clau de l’òbra d’Andrzej Sapkowski, l’insasibla Ironda (chafre de Ciri), entà la retrobar abans la Caça.
En aquera corruda contra lo temps, lo broishèr que serà ajudat per un nombre important d’aliats istorics, com Triss Merigold, Yennefer de Vengerberg, Jaskier, Vesemir e un hèish d’autes.
Plan segur qu’i aurà dolors e escadudas, causidas e consequéncias de las imprevisiblas (conclusions qui’vs forçaràn a tornar començar lo jòc mantun còp en bèth esperar har miélher).
Sortit en 2015, aqueste jòc de l’univèrs deus complèxes, que’vs harà descobrir un monde obèrt de 136 km² ordiat de plan e vivent. Peu quau e poderatz descobrir la negror de la natura umana, mercés a las 191h de jòc possiblas (que’vs calerà un minimau de 50h entà acabar l’istòria principau) e a las 36 fins que podetz conéisher en arribar au cap (çò qui n’ei pas briga de bon har).
The Witcher III : Wild Hunt qu’ei un jòc enlà de la nòrma e per estar drin aluenhada de l’intriga originau, qu’ei ua adaptacion fidèu deu tribalh de l’autor. Que’vs convidam a v’i pèrder, qu’i poderetz apréner quauquarren sus vos e i encontrar lo Diu Negre ! Bon viatge…
