Lou Seriol : cervesa, cèps e ròck n’ròl !
Lo grop de las valadas occitanas d’Itàlia Lou Seriol que veng de sortir lo sué quatau disc aperat Occitan.
Amassats en 1992 devath la volentat deus frairs Degioanni (qu’avèn 12 ans a l’epòca!), los musicaires de Lou Seriol qu’an tostemps pres los camins de travèrsas entà existir en auto-produccion en contunhar de tribalhar a costat deus concèrts.
Lavetz, quin e cau definir Lou Seriol?
Segond jo, Lou Seriol qu’ei (dab La Talvera totun) lo solet grop de punk d’expression occitana. Inspirada a la debuta deu « mèste » Sergio Berardo, la loa musica que put au punk de mes en mes, un exemple dab la loa version occitana d’Anarchy in the UK deus Sex Pistols, de qui ei devengut Anarquia en Occitania; lo tèxte que’s vòu radicau, dab còps de pès au cuu a l’IEO (desolat), au Felibritge e a l’Espàci Occitan de qui vòlen, segond eths, tot conservar e hicar la cultura occitana enas veirinas deu passat. Que l’avetz comprés, Lou Seriol dab aqueth disc n’ei pas vengut entà cirar las pompas de las institucions e deu hialat occitan: de tota mòda, n’an pas jàmes avut arren a esperar d’eths. La pròba? En 2001, lo prumèr de qui’m hedó descobrir Lou Seriol qu’estó Mixu Michelena, cantaire deu grop deu Vascoat Sustraia… qu’amuisha a quin punt los occitanistas e son gahats dab aqueth estile. Mouhahà.
L’auta canta de qui m’agrada au còr deu disc Occitan qu’ei la canta dau bolet, de qui ei ua declaracion d’amor aus camparòus. Las cantas Constellacion e Darbon que son mes hens l’estile de basa deu grop.
Fin finau, lo quatau disc deu Seriol qu’ei un petit plaser per las aurelhas. Dab ua energia tostemps intacta. E aquò que hé ben au còr.
