E coneishetz lo ligam dirècte enter Hastingues en las Lanas e Quiòto en Japon ?

Non podetz pas har shens conéisher los Pokemons, aqueths mostronets vienguts de Japon enlà qui mantuas generacions de mainatges an coleccionat e jogat a capturar e masedar entà miar combats fantastics enter amics. Çò qui non sabetz pas dilhèu, qu’ei qu’un d’aqueths Pokemons e tròba las soas arraditz a Hastingues, au bèth miei de las Lanas.

 Dens lo parçan de Hastingues, que s’i conta qu’un tarrible mollusc minjacarn, miei sèrp miei escargòlh, pelut e limacós, aperat “Lo Carcòlh” e viu en las pregondors de la bastida. Aqueth aujami que sortiré de la soa tuta a cada generacion, entà minjar carn umana.

N’avem pas mei vist nat carcòlh a Hastingues desempuish lo sègle XVI^au, mes la legenda tostemps plan viva aquiu, qu’a traucat lo monde sancèr entà gahar pè en Japon. A Quiòto, los emplegats de Nintendo encargats de desvolopar l’univèrs de Pokemon que s’inspirèn deu Carcòlh entà dar la lutz a la creatura Colimucus, qui coneishen adara los mainats deu monde sancèr.

Que poderatz bèthlèu descobrir en imatges l’istòria deu carcòlh e mantuas autas causas singularas de noste dens la navèra emission d’ÒCtele dedicada aus Secrets d’Aquitània, produsida dens l’encastre deu Contracte D’Objectius e de Mejans dab la region Navèra Aquitània. OVNI, creaturas fantasticas, lòcs mistics, istòrias extravagantas, personatges mauconeguts… que s’i tròba de tot ! E dens quauques mes, lo presentator Fred Handy que v’at desvelerà tot sus lo noste siti octele.com !