Seleccionar una pagina

TV

0 |

Letra duberta per una television occitana

Dempuèi sa creacion en 2012, Tè Vé Òc obrèt per se professionalizar. Per çò faire creèt un emplec ajudat, CDI dins l’encastre d’un CUI/CAE, en genièr de 2015. Evidentament, aquel emplec nos donèt la possibilitat d’enriquesir nòstre trabalh en creant d’activitats mai precisas e mai ricas. L’associacion fuguèt mai coneguda mercé a un trabalh seriós de comunicacion, son site venguèt mai complet e mes a jorn regularament, d’emissions mai bèlas fuguèron realizadas e la preséncia de la salariada permetèt a la còla de respondre a de demandas d’intervencions dins de luòcs divèrses (Cafès Òc, Festenaus, Talhièrs de lenga per adultes, Formacions CFPO, UOE de Nimes…)

Dempuèi quauqueis annada, la creacion d’una vertadièra television occitana fuguèt evocada. Nos enganem pas, per un tal projècte faudrà la collaboracion de totei leis occitans e metre de costat totei leis EGO e recampar totei nòstrei fòrças.

I a un vertadièr besonh a mantuns nivèus de faire conèisser e ausir nòstreis idèas, nòstrei besonhs e nòstrei revendicacions sens passar per lo canau obligatòri dei medias actuaus formatats per son etern jacobinisme.

De segur existisson sus França 3, dins mantunas regions, de jornaus televisats o d’emissions en lenga occitana. Mas quala que siágue sa qualitat, aquò demorarà totjorn « la votz dau mèstre », sens vertadièra libertat d’expression.

Crear una television tradicionala reconeguda, figura dins la TNT o lo boquet dei box, crese qu’i fau pas somiar, que lo cost de la sola inscripcion seriá ja dificila de recampar. De que nos demòra ? Sonca internet onte a mendre cost un logiciau adequat pòt èstre utilizat. Pense pas judiciós d’aver coma esponsòr una collectivitat granda, comuna o region, que s’avisariám lèu que sem muselats, e qu’una prioritat en aquela collectivitat seriá forçadament  establida.

Lo recors ai collectivitats es possible coma patenari addicionau, mas qu’a pas dreit d’agach sus una linha editoriala. Demòra la publicitat que dèu pas èstre envasissenta e i a tanben lo recors possible a una mena de mecenat participatiu sota forma d’abonament ?

De tot biais amb lo pauc de mejans qu’auriám, lo benevolat seriá quasiment obligatòri, en defòra de quauquei personas necitas per un secretariat e una tecnica constanta.

Primièra necessitat, l’obligacion d’un jornau d’informacions, condicion per venir una vertadièra television. Se pòt limitar a un per jorn, a la debuta, mas se dèu lèu lèu estòfar.

Coma se pòt organizar aquò ? Crear una cuberta de correspondents dins lei regions que pòdon mandar periodicament d’infòs en vidèo amb comentaris e ITV. Mandan sei vidèos a un burèu centrau cargat de lei collectar e de lei metre en linha. Aquí fau un vertadièr jornalista. Segur qu’aqueli vidèos serián de natura diversas : politica, art, economia, espòrt ecc…

En mai, a d’oras definidas, de debactes, collòquis, acamps e autrei se podrián veire difusats.

Per la debuta, seriá necite d’establir de redifusions d’aqueleis emissions per difusar de longa.

Ja, un pauc de pertot sus lo terrtòri occitan, d’associacions de creacion de vidèos en occitan existisson e son difusadas per de canaus diferents, internet, rasaus sociaus ec… Es mestièr de se regropar e de s’espandir.

 

Miquèu Gravier  de Tè Vé Òc

 

A prepaus de l'autor

Lo Diari

Aquel compte es bailejat per tota la còla de redaccion del Diari. Es aquel compte que s'ocupa dels afars corrents sus aqueste site e s'encarga de la publicacion dels articles.

M’aboni !

Anóncia

Lo CalenDiari

Obrir lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !