Seleccionar una pagina

Critica musicala

0 |

La part de l’auratge

Lo Barrut es de retorn amb un album novèl, La part de l’orage, que regaudirà los afogats de la còla lengadociana, e farà segurament d’adèptes nòus pr’amor de la bona qualitat de produccion e de l’estrambòrd que desgatja globalament lo disc. La part de l’orage sortirà en dos temps : en setembre en comanda e suls concèrts e en genièr 2021 per una sortida oficiala acompanhada d’una virada.

Photo : Emma Gardeur

Vaquí un disc que seretz fièrs de metre sus la platina quand qualqu’un vos demandarà : as un daquòs occitan de me far escotar ? La part de l’orage, lo tresen disc de la còla lengadociana, lo lor primièr album vertadièr, debuta a fum de calhau amb Indigènas que davala de la encintas de la cadena hi fi coma lo tropèl de bisons que fa ressondir e tremolar las gòrjas ! Tío o encara Mascarada daissan lo meteis sentit, d’autres tròces mai docets coma Exil o d’autres francament aerians coma Lo prètz de la nuèit ne fan un album equilibrat que s’escota d’un lanç. Aquí lo famós eslogan de Goulamas’K « Ràbia e Poesia » pegariá plan. 

La recèpta del Barrut es d’apasimar sas percussions enrabiadas ambe la melodia de las sèt voses que s’entrecrosan e rebombisson sul ritme amb elegància. Lo trabalh de mesa en lum de la votz de cadun es remirable e lo grop sembla mestrejar totalament son art.

Alara que lo tròç Lenas celèbra « lo regne de las bèstias, lo regne dels animals », lo grop insistís sus la metafòra bestiala, e o cal dire, tot l’album carreja quicòm de salvatge. Las percussions menan aquesta animalitat, d’unes ritmes fan rampèl a la musica metal, electro o jungle. La part de l’orage capita de transcriure lo vam, l’energia e quitament la mistica que Lo Barrut manda en concèrt. Es que lo grop ròda las cançons de l’album dempuèi mai d’un an sus l’empont, e lo disc es la resulta de dus ans de trabalh. Lo registrament se faguèt del temps d’una residéncia d’un mes sul platèu d’Aubrac dins un ambient de sòmi, ambe l’ajuda de professionals coma Yoan Jauneaud et Emmanuel Pesnot (NDR : dich « Lo laütièr de las voses »). S’ausís que los tròces son plan mai produsits que suls disques precedents. 

Las tres filhas e los quatre garçons del Barrut son d’amics de l’universitat, cantan amassa dempuèi d’annadas, d’unes participèron quitament a de grops e projèctes respectables (Du Bartàs, Fai Deli…). An d’experiéncia e se sentís una polida coesion dins lo grop. An amassat tant de fisança que pòdon inventar la lor quita musica. Una musica dins la dralha de Du Bartàs o del Còr de la Plana, cèrtas, mas pregondament inspirada dels gosts musicals de cadun, que devinam rock, pop, ragga o electro. Es de bon notar que totas las pistas de l’album son de tèxtes e musicas originals.

Photo : Celine Lajeunie

L’autra granda inspiracion demòra, solide, la tradicion occitana, al mens dins lo biais de cantar. Mas la polifonia que practica Lo Barrut es liura, sembla quitament incontrolabla de còps. La musica d’aquestes sèt cantaires de Montpelhièr s’espandís dins un airal verge de tota tradicion polifonica. S’aiman se retrobar per la cantèra del temps de viatges en Gasconha o nauçar la votz per las glèisas de Corsega, la polifonia tradicionala l’an pas popada. Lor polifonia percussiva es una pura invencion del sègle XXI.

Lo Barrut s’inscriu, del meu vejaire, dins un movement que diriái de « pop occitana », ambe de grops coma Cocanha, San Salvador, La Mal Coiffée, Djé Balèti o Uèi que fan una musica originala, una musica ancorada dins lo temps nòstre, ambe coma matèria de basa la cultura occitana.

Patwa

La part de l’orage

Lo Barrut
Genièr 2021
15 €

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !