Seleccionar una pagina

Critica musicala

0 |

Do « vin » yourself

Rock noise & vin naturau

Dens la familha deu vin naturau, que vorrí lo vin de casa. Après la cervesa e las microbracerias de mòda, que son aus vinhèrs amators de s’exprimir. Be son numerós mei anar mei, a s’apassionar e dedicar ua grana part de la loa vita a la fabricacion d’aqueth shuc tant preciós e, a còps, capriciós. Quau ei lo ligam dab la musica ròck ? Lo « do it yourself », a tradusir per « hè’c tu medish » ! Experimentar, atorejà’s, embriagà’s : SEC, duò de rock noiseLo noise rock qu'ei un corrent brutista (dab bruts) deu ròck considerat tanben com punk experimentau. originari de Colomièrs e basat adara dens Tarn, que hèn vin coma musiquejan.

Dus musicaires amics de longa data, atau lo duò SEC. Jules Ribis a la baisha e a la canta, e Xavier Tabard a la bateria e a la canta tanben. Ua musica escricada, poderosa, narrativa, a còps absurda e tostemps caradreta. Que son coneishuts preu país tolosan tà atraçar monde a l’entorn de projèctes autant ambiciós coma underground. Quau ligam dab l’arrasim ?

Qu’i vieni. Après las « Susmautas filarmonicas » (E.P.S. aka Emeute Philharmonique de SEC), que gesseish ua epopea musicau : « SEC rencontre George Gallamus aux vendanges ». Au temps de las vrenhas, qu’encontran ad aqueth personatge per las Corbièras, eròi futur de l’aventura musicau qui’us aten : l‘Aventure complète de George Gallamus de l’ua part, e las soas « aventuras apocrifas » de l’auta, qui an amassat pas mensh de trenta formacions musicaus – dont Cocanha e hè partida ! – Mister Bishop, L’Œillère, Krav Boca, Simon Barbe, Edredon Sensible, No Noise No Reduction, Ultra Zook… en mei d’un detzenat de grafistas plastician·a·s, e de nau estructuras tà’n portar la produccion.

Au contacte de quauques vinhèrs, que començan a ‘massar l’arrasim, puish a vrenhar vitatges abandonats, a lambruscar e arrecaptar damoras de vrenhada. Lo vin que’us sembla un saber-har de bon apoderà’s. Trolhar, traupir a la rapiditat de qui cau, en foncion de l’espessor de la pèth deu frut, observar e compréner la vita de las bacterias, tribalhar ua mestior viva, hà’s suspréner, compausar dab çò qui s’escad, sublimar las errors, inventar mesclanhas, experimentar… afinà’s lo nas, com s’afinà’m l’aurelha, e apréner a’n parlar. Lo vin que passa tanben preus mots. Aventura apocrifa ? Çò qui vòu díser « dont la veracitat n’ei pas establida ». Quan contan quin e’s son formats, quin an arrecaptat informacions, que pareishen a etnomusicològs, miant enquistas, collectant los joens e los ancians, en cèrca d’ua vertat sus saber-har deus misteriós, suus sens, sus las recèptas… e qui s’avisan l’informator·a e’s va contradíser d’un encontre a l’autre. Au mélher completà’s lo discors, au pis, cambià’c deu tot au tot. « Tota persona qui’s vòu interessar au vin naturau, ne deu pas viéner cercar-i ua vertat absoluda » çò precisa lo Xavier. « Çò de viu que serà tostemps susprenent, que siin plantas o personas ». Tau com suu camin deus musicians e musicianas qui s’interessan a l’oralitat e a la cultura populara.

Quina fiertat de passar per malhas, de non pas deishar aus especialistas diplomats aquera mascadura de tot dia, de portar aus amics quauquas botelhas a partatjar, e un bon vinile a escotar ! Que’s pareish e’s van interessar enqüèra din mei a l’occitan. Quauquas suspresas cocanhencas que’s preparan.

Illustracions del article : Suzanne Cardinal & Léonard Thoyer

A prepaus de l'autor

Caroline Dufau

Bearnesa expatriada a Tolosa, Carolina Dufau, dicha Carò, es una artista de terren, mai tots-terrens, de la cantèra, art que mestrèja "de com cau", fins a la vidèo al dintre del Collectiu Dètz. Carò canta dins lo grop 100% femenin Cocanha e dins d'autras formacions, e es tanben redactritz al Diari.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !