A l’azard Bautesar, dos teen movies
Es sus MyCanal ò en VOD que lo critic afamat se fa uei son festenau de filmes recents. Seleccion au jorn lo jorn, lo jòc per eu es de charrar d’òbras que vei coma arriban, a l’azard de sei matins e, de còps que i a, pecaire, de sei jornadas. Impression dau moment ? Una crisi tòca lo cinèma recent, e mai foguèsse adreiçat ai jovents. Tèsi/Antitèsi. Doas experiéncias per preadòs, adòs e pòstadòs : Scooby ! e l’afrós BrightBurn.
Scooby !
La chorma de Scooby-Doo a bòrd de son camion dei colors psiquedelicas ensaja de menar una enquista dins un scenari mau definit. A nòstre grand regret, Tony Cervone es un realizator qu’a l’especialitat de reprene per l’ecran bèu lei dessenhs animats de nòstra enfança : mai que mai Tom e Jerry segon sa filmografia. Scooby escapa pas a sei « spin off » peresós. Riche perque la Warner dempuei 1996 crompèt lei drechs a Hanna Barbera, lo còp comerciau vau lo còp tant que pòu dins una estetica laidassa en imatges de sintèsi ; recampa ambe sei dessenhs animats sens arma fachs a la lèsta e a l’ordenador la generacion dei gents nostalgics e de sei pichons pròches de l’apoplexia tant engolan aqueleis imatges rapids e colorats, sucrats e descorants coma de bònas Haribo. Siam luenh dau trach espés e atrivant de la làmia Mantalo ò dei Fadats dau volant. Perdèm tanben la tòca beatnik que fasiá lo chale deis aventuras dau chinàs e de son collèga Sammy. Direm que per se desrevelhar davant una bòla de Benco, l’istòria es pas tant marrida qu’aquò perque festeja lo rescòntre de Diabolo, Satanàs e dau Cerbère gregau. Avèm lei mites que podèm…
Dessenh animat american (2020),
ambe lei votz de Zac Efron, Will Forte, e Gina Rodriguez.
BrightBurn :
lo dròlle dau mau
Per lei preadolescents que siam, amorós de l’òrre, afeccionats de sang e de còrs romputs, de bruchs d’òsses e de maissas arrancadas, òc, per nosautres, lei diables dau radassier, vaquí l’òbra crudèla e ideala que nos fau. Nos agradarà de nos identificar a-n-aqueu dròlle, personatge principau, enfant desvariat, frucha improbabla d’un Superman inconegut e d’una kriptonita (pichòt, me levaràs aquela besonha que pren de plaça dins lo garatge) qu’a lo poder au sens pròpri e figurat de tuar lo paire, ò la maire, ò lei dos. La produccion es ben sonhada e auriam jamai pensat que lo negatiu dau supereròi, dau fisic dau gent Elliot dins E.T., un drollet que podriá èstre ton fiu ò ton frairòt, a l’encòp dròlle ò extraterrèstre, ben bravet quora engolís sei Kellogg’s au matin, ben ensenhat coma fau, seriá colpable de tant de mòrts. Familhas, vos ai en òdi ! Coma gausar dire que l’enfança es assassina ? De mon sovenir, s’èra jamai vist au cinèma ; aquí pas de perdon, pas de morala, te, e ve, es aquò que te fa de ben dins aqueu periòde moligàs. Leis amorós dei signes a la David Fincher s’i retrobaràn. Podèm dire que la realizacion de David Yarovesky es… coratjosa.
Filme american d’orror e d’espavent (2019),
ambe Jackson A. Dunn, Elizabeth Banks, David Denman.
