Dempuèi son primièr roman, Lo barracon (IEO, 1996), Sèrgi Gairal nos propausa una granda varietat d’obratges. Dins aqueste, lo vint e dosen, nos propausa l’estudi d’un aspècte de la lenga d’un escrivan de tria, Ferran Delèris (1922 – 2009), los « imatges ». Escriu dins l’avantprepaus : « Ai tornat legir sos obratges, ai tornat descobrir e saborejar la lenga mirgalhada de Ferran Delèris. Disi plan “saborejar”, qu’es una lenga imatjada plan mai que cap d’autra… » La lenga mirgalhada de Ferran Delèris, a l’encòp florilègi d’imatges e estudi lingüistic a legir pel plaser e, perqué pas, per aprene o melhorar la coneissença de la lenga, compte tengut del caractèr pedagogic d’un tal obratge.