Lo cavalièr sens cap – La legenda de Sleepy Hollow

Se pensatz trobar la meteissa istòria que dins lo film de Tim Burton, vos enganatz un pauc. Cal dire que La legenda de Sleepy Hollow de Washinton Irving es mai una longa novèla que non pas un roman. E mai lo personatge principal n’es diferent : al luòc de far l’inspector de polícia, Ichabod Crane es un regent qu’educa los mainatges de Sleepy Hollow – la val aconsomida – un masatge prèp de Tarry Town, pichon pòrt de campanha a la broa del riu Hudson.

Lo fantastic de l’autor se basa sus las cresenças de sos abitants, eretadas del folclòre de las tradicions germanicas e neerlandesas transmesas pels primièrs colons d’aquela region. Las istòrias de trèvas obsedisson nòstre regent de campanha e nos menan per son punt de vista dins la zòna fosca entre explicacion racionala e explicacion subrenaturala que fa lo chuc e lo muc d’aquel genre literari.

Poiriatz trobar a dire sus la durada d’aquela istòria, corta que corta, que fa pensar que l’intriga a pas lo temps de se desvolopar, mai que mai quand las descripcions capitan de nos mandar dins un ambient campèstre a l’encòp sorne e meravilhós. Mas tal un bon conte de velhada, La legenda de Sleepy Hollow es mai qu’una simpla istòria per far paur. L’Ichabod del libre es pas tant aimable coma lo del film : supersticiós, golard – las descripcions del manjar vos pòdon far amassar talent – e ambiciós, cobeseja l’ascension sociala que poiriá obténer per un maridatge amb la jove Katrina Van Tassel, polida filha d’un ric pagés del parçan. E dins aquel prètzfach, li caldrà far rampèl a Brom Bones, un masclàs tarabastós e farsejaire. Mas qual, d’aquel jove rival o del terrible cavalièr sens cap, serà son enemic pièger ?