Seleccionar una pagina

Tòca-Maneta

0 |

L’escòla del gameplay d’argent

Crèdit fòtos : 1 – Celeste / 2 – Donkey Kong Country Tropical Freeze © Nintendo / 3 – Bayonetta 2 © PlatinumGames Inc

Chaspaires de maneta, picanhaires de botons, balhaires de jòia a stick e esportius de canapè, adissiatz !

Es un art lo vidèojòc ? Galegi : aquela question, que serviguèt un temps a legitimar lo vidèojòc, es uèi daissada un pauc de costat pels especialistas. La mena de question obèrta que lança de debats etèrnes, benlèu esclarzits dins l’avenidor.

Per contra aquela question etèrna ne mena un autra, mai concrèta, que d’unes trantalhan pas a se pausar : se lo vidèojòc es un art, qué fa d’el un art especific ? Vòli dire la literatura, la pintura, lo cinèma, per aquí son passats e lo scenari, l’estetica, la realizacion d’un vidèojòc son fin finala inspirats de tot aquò, e aquò sol fariá del mèdia un aglomerat de tot mai qu’un « concèpte artistic » novèl e a despart.

E ben i a de jogaires que se pausan aquela question, e qu’i respondon : de jogaires que seguisson çò que se chafra « l’escòla del gameplay », e que van doncas considerar que l’especificitat del vidèojòc, çò que seriá a mand de far categorizar lo mèdia coma art per sa capacitat a provocar d’emocions es… lo jòc. O lo gameplay, per tornar prene l’anglicisme consacrat.

Lo gameplay, que d’unes reviran per « jogabilitat », tèrme que malastrosament capta pas completament l’esséncia del daquòs, es lo biais de jogar, las règlas impausadas o presentadas pel jòc e a l’encòp lo biais qu’aurà lo jogaire de las utilizar, de se’n servir, de las desvirar de còps que i a. Es l’encontre entre çò que lo creator concebèt e çò que l’utilizator concep per dessús. En un mot es l’accion, una accion prepausada pel jòc e efectuada pel jogaire, una accion reala e pas imaginada. E aquò es, òc-ben, una especificitat del vidèojòc, quitament se notam qualques ensages d’interactivitat dins d’autras arts.

Oblidam doncas los grafismes, la narracion, fagam abstraccion de l’atge d’un jòc, çò que compta es de saber se se jòga plan, se lo level design (la concepcion concrèta del jòc e sa progression) es engenhós, se la dificultat es plan dosada, es aquò « L’Escòla del Gameplay ».

Aital, Nintendo s’es longtemps fargat sa reputacion de cap de la dicha escòla, amb de jòcs coma Donkey Kong Country, mas uei vesèm de mai en mai aparéisser de jòcs que fugisson l’espectacular, amb una bèla intemporalitat visuala, una narracion en rèireplan, mas un temps de presa en man consequent, un challenge exigent e çaquelà satisfasent.

Aital Celeste es un jòc amb un scenari minimal (una filha partís a l’assaut d’una montanha, simbòl de sa ment tafurada), de grafismes en pixèls e una dificultat dessenada que, pauc a pauc  provocarà en çò del jogaire d’emocions, benlèu las meteissas que son eroïna… Dins Celeste es lo jòc pur que se carga d’escriure l’istòria e sa dificultat, luènh d’èsser punitiva pel plaser, a un sens e un interès.

O encara los japoneses de PlatinumGames, amb lor saga Bayonetta, d’un scenari absurd mas d’una jogabilitat regaudissenta, nerviosa e bruta.

Bon, segur, la dificultat d’un jòc es una bona part de l’escòla del gameplay, totes los jogaires se’n podràn pas dire, e caldriá seriosament pensar a la tornar chafrar « Escòla de la Maneta d’Argent »…

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Tristan Gahús

Tristan Gahús es l'escais, coma aquò se fa dins aquel mitan, de qualqu'un qu'aima plan los videojòcs e qu'es prèste a partatjar sa passion en occitan. Autor de detzenas de cronicas, de còps radiofonicas, sus las sortidas recentas, chafradas Tòca-Maneta, tòrna sul Diari amb una novèla formula, mai larga e mai "trans-mèdia", coma se ditz en occitan blos !

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.