Seleccionar una pagina

Dorsièr

0 |

ESCÒLA OCCITANA D’ESTIU

L’occitan a portada de lenga per totes

Del 11 al 17 d’agost de 2019 l’Escòla Occitana d’Estiu prepausa a Vilanuèva d’Òlt un estagi per immersion d’aprendissatge, d’aprigondiment e de practica de la lenga occitana per totes (adultes, adolescents, mainatges).

Nascuda fa quaranta cinc ans, a la seguida de l’Universitat Occitana d’Estiu e per la perlongar, l’Escòla Occitana d’Estiu aguèt totjorn la tòca de far viure la lenga occitana, de la far passar, de la  socializar pendent tota una setmana, en immersion.
Aqueste estagi s’adreça a totes los, quin que siá lo sieu nivèl, qu’an enveja de cabussar dins la lenga, per la descobrir, se l’apropriar, se la tornar apropriar, o de la practicar del matin al ser – e de còps que i a del ser al matin ! – de contunh, dins totas las activitats prepausadas e tanben dins totes los actes de la vida vidanta. Quin que siá lo vòstre nivèl, i poiretz seguir corses de lenga jos una fòrma intensiva (6 h/jorn) o mièg intensiva (2 h/jorn). Aqueles corses son balhats en tres dialèctes (lengadocian, gascon e lemosin) e tres nivèls (A, B, C).

En causissent la formula mièg intensiva, auretz la possibilitat de seguir la vesprada un talhièr cultural (etnografia, toponimia, escotar e dire, descobèrta del país e de la siá istòria, informatica…) que vos permetrà de contunhar a vos apropriar la lenga en situacion d’un biais mens escolar. Poiretz tanben seguir talhièrs especifics en fin de matinada o a la debuta de la vesprada (cant collectiu, « wiquimedi’Òc », meditacion/relaxacion, dança pels debutants…). En fin de vesprada auretz una causida de conferéncias (istòria, actualitat, literatura, filosofia…). La velhada que s’acaba a cada còp per un balèti es consacrada a la descobèrta de la creacion artistica occitana (teatre, concèrts, contes…).

A l’E.O.E., venètz-i en familha ! Mentre que seguiretz las activitats per adultes, los vòstres enfants (drollets de 5 a 9 ans e adolescents de 10 a 16 ans) seràn preses en carga per d’animators que lor prepausaràn activitats manualas, artisticas, ludicas, esportivas… adaptadas al siu atge e en immersion linguistica. La paraula « escòla » vos deu pas espaurugar : quitament se lo trabalh que s’i complís es seriós, es pas reguèrgue ; l’E.O.E. es tanben al còr de l’estiu e de las vacanças, un moment gaujós, festiu de convivéncia que l’aprendissatge s’i fa pas dins la dolor mas dins lo plaser !

Una informacion practica : sètz pas obligats de seguir l’escòla tota la setmana ; i podètz venir a la carta  (de una jornada a tota la setmana).
Ongan, vos prepausam a las velhadas : lo diluns 12, teatre : « Un òme dins la nuèit » pel teatre del Platanièr ; lo dimars 13, contes pels contaires de l’E.O.E. ; lo dimècres 14, balèti ambe Licotissa, Matilda Duffau e Anna-Lisa Herbel ; lo dijòus 15, la velhada dels estagiaris ; lo divendres 16, la Fèsta occitanocatalana al còr de la bastida, plaça La Fayette : repais al mercat del terrador, e concèrt/balèti ambe Coriandre e Se’n Fa Una.

A prepaus de l'autor

Bernat Bergé

Ancian professor d'occitan, Bernat Bergé, qu'aima de se chafrar lo "Bernat Contaire" se dedica ara a l'escritura, mai que mai de contes, qu'aima tanben de presentar sus l'empont davant un public esbalausit per sas istòrias modèrnas e plan sovent risolièras. Escriguèt aital “L’Estilò Negre” (2001), “Un còp èra la salsissa” (2008), “Paure Monde!” (2010), "Limitas" (amb J. Bodon, J.C. Sèrras e B. Cauhapé, 2015) Bernat Bergé es tanben plan implicat dins l'Escòla Occitana d'Estiu e dins son país, d'entre Sava e Garona.

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !