Canard amb de naps
Lo poèta Josèp Tellièr èra de prèp de Montpelhièr e nos a daissat una recèpta en vèrses, Lou canard as naps, publicada dins Agriotas e poumetas (1933). Vos ne prepausam una version normalizada.
Ingredients
1 canard
naps
raspura''raspura'' o ''raspadura'', pòt èsser de raspadura de pan sec trissat.
lard
Preparacion
Ò ! un canard ambe de naps,
Es pas michant quand es plan fach !
Lo dificile, es d’ordinari,
D’aver tot lo necessari !
Mès vos vau dire dins un mòt
Cossí se fa aquel fricòt.
Dusc’au moment de la senténcia
Vòstre canard fa abstinéncia.
Començatz donc per vòstres naps,
Rasclatz, lavatz, entopinatz,
Fasètz bolir mièja jornada.
Quand son venguts en marmelada,
Vojatz aquò dins un grand plat
Coma se fa dau cervelat.
Per ie donar bona figura,
Metètz dessús quauqua raspura1,
Laissatz fregir una ora e quart,
E n’arribatz a vòstre canard !
Quand a finit de faire fèsta
Venètz, e ie copatz la tèsta,
Vite, vite, l’esplomassatz,
Lo dubrissètz e l’embolnatz.
De lard, fasètz, sa matelòta,
E lo metètz dins la cocòta.
De fuòc dejós, de fuòc dessús,
E vira, vira, dins son jus.
Quand es rossèl, que fai botiòla
Podètz servir vòstra bestiòla.
Res de milhor, quand es plan fach,
Qu’aquel canard ambe de naps.
