La seleccioneta del Diari : Brassens cantat en occitan
La seleccioneta del Diari :
Brassens cantat en occitan
Corne d'Auròc
Corne d’Auròc volume 5
Cèucle Occitan Setòri/Cèucle Max Roqueta – 08/2021
14 cançons – 18€
Lo triò de Felip Carcassés canta Brassens dins la lenga que deguèt ausir jove, amb los ritmes e instruments tradicionaus que li convenon, tant es verai que lo setòi es prestit de melodias popularas mediterranèas. E lo 5en òpus dau grop setòi dedicat au mostachut sortís juste ! Vos conselham d’alhors d’agachar çò qu’aprèstan dau costat dau Cèucle Setòri, amb la reviscolada anonciada de lor Almanac, Felip Carcassés i deuriá evocar sas adaptacions… e las dificultats rescontradas.
Melhau chanta Brassens
Jan dau Melhau, Frédéric Chabalier, Marianne Tixeuil
Lo Chamin de Sent Jaume – 10/2019
22 chançons – 1h03min – 15€
Jan dau Melhau e Brassens quò es 22 chançons enregistradas en companhiá de Frédéric Chabalier e Marianne Tixeuil a la guitarra dins una interpretacion pro sòbria e fina, mas tanben 50 traduccions fachas e publicadas dins un recuelh, Cinquanta chançons de Brassens reviradas per Melhau (Lo Chamin de Sent Jaume, 2014). I vesem e auvem tota l’exigéncia literària dau lemosin per reüssir a far sonar l’eime de Brassens dins una autra lenga, tant precisa coma la siá.
André Chiron canto Brassens en prouvençau
André Chiron
1978, 1979 (reedicion 2002)
21 cançons
André Chiron a, en mai de la legitimitat donada per lo pòrt d’una mostacha, aquela d’èstre estat un dei promièrs d’aguer cantat Brassens ambé lei musicians de Brassens, de l’aguer cantat en provençau (traduccion de Pierre Paul), e d’aguer agut leis encoratjaments dau mèstre per aquò. Si tròban encara lei dos volumes de André Chiron canto Brassens en prouvençau, reeditats en CD. Encuei contúnia aqueu camin, ambé un espectacle recent, Brassens inconnu, méconnu.
Plan segur, aqueste Tòp 3 pòt pas èsser exaustiu !
Volèm citar tanben La Sauze, lo « Brassens occitan », Marti, Mej Trio amb Eric Fraj, Joan Pau Verdier e Peiraguda, Pèire Boissière e Ténarèze, Marcel Amont… e n’oblidam segurament !
