Seleccionar una pagina

Clic & Scroll

0 |

A qui profieita lo finançament participatiu ?

Lo crowdfunding – finançament per la horrèra – qui sembla aver vivut lo son atge d’aur. N’ei pas enqüèra tot a fèit passat de mòda. Qui n’a pas aidat a escolans tà partir en viatge, a musicaires tà anar enti’au cap de la sortida d’un disc, o a legumaires biò tà desvolopà’s la produccion ? Los sites que son ulule, kisskissbankbank, kickstarter, helloasso, leetchi… Aqueths utís de collèctas de sòus en linha que s’i hèn, e mélher qu’ua caisha virtuau, pr’amor d’estar un supòrt de comunicacion mei tà qui’s vòu har conéisher lo projècte. Tota ua estrategia qui a lo son còst.

N’ei pas estratègue de la comunicacion qui vòu. Qu’ei ua competéncia professionau qui s’externaliza, e s’aplica tanben a las campanhas de crowdfunding. Lo desvolopament de las rets sociaus qu’a vist a vàder lo mestièr navèth de community manager : lo o la qui’s sap quin e cau comunicar sus la pielassa de supòrts web tostemps numerós. Qu’ei de bon saber, se voletz aviar ua campanha de finançament per la massa d’internautas : un còp la platafòrma de collècta causida, un long camin que’vs separa de la dineròla plea. Se’vs prenen ua comission suu tesaur amassat, que’vs minjaràn tanben fòrt de temps ! Cèrtas, las pajas de collèctas que crean actualitats, en fabricar petits eveniments au briu deu desvolopament deu projècte. Mes que cau seguir la campanha, balhar novèlas, relançar los internautas, alargar lo hialat. E un còp tot açò hèit, e lo porquet plen : enviar las contrapartidas ! A un vintenat de contributors, que pòt anar. E a mei de quauquas centenas ? Quin tribalh ‘mics. En tot deishar 8 o 10 % deu cabau, au site internet, que v’a botat la pression tà que la campanha e sii ua escaduda. En mei, que possan a har mélher que non pas l’objectiu previst. M’estonas ! E seré pr’amor d’açò musicians e labèls e s’arreviran de cap tà la bona vielha soscripcion, hèita de papèrs, chècs e corrièrs enviats per la pòsta ?

Qu’èm en dret de’s pausar la question aquesta : a qui profieitan aqueras collèctas ? Que’ns brembam de l’emission de ràdio Good Morning Occitània, sason 2013-2014, un còp de pè en la hromiguèra deus mèdias occitans. Fresca e vitèca, aquera emission de ràdio, mutualizant las competéncias, que s’i èra escaduda a amassar 4 422 € a la fin de la permèra sason, entà poder contunhar la soa accion. E qué ? Qu’a seguit, chic, puish que s’ei estupada. Ua auta campanha, qui a mercat per la soa originalitat, la soa inventivitat, e sustot la qualitat incomparabla de la soa comunicacion, qu’èra la de La SeriaLa Seria - Julien Campredon e Amic Bedel - Piget - 2014, escriuta e realizada per Amic Bedel e Julien Campredon. Dus pilòtes presentats en un clip de 8 minutas, d’un ton arrident e destimborlat, suber escriut e hòrt plan realizat, ajustat a publicacions dab visuaus e punch-lines de tria. Au cap deu temps impartit, La Seria qu’amassà 9 335 € lo 30 de julhet de 2014, a saber 116% deus sòus demandats. E la seguida ? Que’s cèrcan enqüèra emparas e difusors entà poder desclavar los finançaments que tota produccion audiovisuau d’aquera qualitat a lo dret d’aver. « L’impossibla destinada audiovisuau occitana… » ? Assegurà’s de l’adesion deu public, qu’ei ua bona causa. Mes ne carré pas eslissar chic a chic cap a un desengatjament de las institucions e un remplaçament de las aidas publicas per aqueras magras contribucions a l’escala de çò que còsta reaument un filme, un emission de ràdio, un disc… qui hèn besonh au paisatge mediatic e culturau. En tot pèrde’s au passatge lo percentatge preus intermediaris. Lavetz, a qui profieita lo crowdfunding, que m’ac demandi.

A prepaus de l'autor

M’aboni !

Anóncia

Lo CalenDiari

Obrir lo CalenDiari

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !