3 navèths programas entà la rentrada sus ÒCtele !
ÒCtele que signè dab la Region Novèla Aquitània un contracte d’objectius e de mejans (COM) entà 2018-2020. Que pertòca lo sosten e la valorizacion de la produccion audiovisuau en lenga regionau e qu’implica 3 autas cadenas : France 3 Aquitània, TV7 Bordèus e Kanaldude.
Dens l’encastre d’aqueth COM, 3 navèths programas qu’arriban :
ÒCKay
Presentat per F. Handy dab un scenari de J-N Commères. Un programa umoristic de descobèrta de la lenga, a destinacion deus qui desiran se familiarizar dab l’occitan. La 1èra sason que comprenerà 40 episòdis de 2 mn, difusats sus ÒCtele, Noa (web tele de France 3 Aquitània) e dilhèu sus France 3 en hertzian. L’inspiracion qu’ei la deus « Youtubeurs » : un presentator fàcia camera, qui incarna mantuns personatges e qui presenta expressions / vocabulari / concèptes.
T’ÒC T’ÒC
1èra visita. 2 joens occitanofònes a la descobèrta d’un lòc inacostumat que n’aurén pas visitat solets. Ua visita suspresa : que descobreishen lo lòc quan i arriban. L’idea qu’ei de filmar las loas reaccions, lo lor sentit. L’emission qu’ei filmada en partida dab lo smartfòne. L’idea qu’ei de córrer la region e de crear un ligam hòrt dab los escòlas/collègis/licèus deu territòri e las estructuras qui ns’arcuelhen. Qu’avem miat joens dens ua marbreria, un centre de tria, ua basa militara aeriana, etc. Entà la 1èra sason, que i aurà 20 episòdis de 6 mn.
Espòrts d’Aqui
Programa a l’entorn deus espòrts presentat per E. Arrosèras. A cada episòdi la presentatora que’ns hè descobrir un esportiu qui explica la practica de la sua disciplina. Après l’explicacion e la demostracion, la presentatora qu’ensaja l’espòrt e que veiratz que n’ei pas tostemps ua escajuda !
