• La discutida pren d’ample : trufada o aligòt ? Las patanas, las formas e los lipets son en discutida permanenta per saupre lo melhor alara que, fin finala, tot es bon !

• La discutida prenguèt d’ample a l’Amassada generala de 1980 de l’IEO a Orlhac : l’IEO, un institut scientific vodat a la recèrca o un esplech d’accion culturala per tota la populacion ? Fin finala, i a pas d’alternativa : valdriá mai caminar sus las doas cambas.

• Gerbèrt d’Orlhac foguèt lo Papa de l’an mil. El qu’èra matematician (e tanben filosòf e mecanician : sabi pas s’aviá lo temps de s’ocupar de teologia e s’aviá consciéncia de la poténcia imaginària d’aquel nombre : mila). Pel mai grand plaser dels escolans, se ditz qu’inventèt las taulas d’operacion. Mas, lo pauròt, coma de son temps i aviá pas de patanas, jamai agèt pas sus sa taula aligòt nimai trufada. De còps, es complicat d’èsser un personatge important… Òm se pòt enganar d’epòca !

• Normal qu’acabèsse lo millenari en se faire nomenar Silvèstre per nom pontifical coma un rendètz-vos de cap d’an que, de son temps, se trapava a un autre moment de l’annada. Benlèu coma una premonicion…

• Castanhas : Se volètz ganhar lo concors de plumatge de castanhas a Morjon en 2024, vos podètz vos i metre a plumar bananas, iranges, pomas, peras… per n’arribar al moment-clau d’enlevar la pèl a las castanhas.

• Culturas : I a plan mai qu’a Bordèu que femnas pòdon vendre pomas e castanhas. En Cantal, cada tardor, se ten la fèsta dels Palhàs qu’a una dobla tòca : un eveniment cultural – los Rescontres occitans – e una fièra de país : fièra de las pomas e de las fruchas de tradicion. Atal, la cultura es a l’encòp l’expression artistica, mas tanben la mesa en abans dels biaisses de viure, de las tradicions, e de la transmission entre las generacions.

• Agach : Perqué la vaca de Salèrs me gaita de coa d’uèlh e me fa lo morre ?

• E Rapaton rapatona lo temps de las Rapatonadas : quand ven novembre, Rapaton cèrca quauqua sala d’espectacle o d’autres luòcs (mediatècas, restaurants, ostals de retirada, escòlas…) per escotar contairinas e contaires en esperant que la votz occitana clantisca a egalitat amb las autras expressions.

• Salas : Mas probable que i a pas pro de maçons dins lo país per bastir salas. Atal, l’estiu son obligats d’organizar un festenal de teatre per carrièras…

• Charrada : Mon primièr rabala jos tèrra, mon segond se deu descloscar ; mon tot es un poèta occitan d’Auvèrnhe. Qual-a a pas reconegut l’Arsèni Vermenosa per nos faire present de flors de brossa jos la clujada ?

• Librariá : Cercatz un libre occitan ? De segur, lo traparetz a l’Ostal del libre amb Descobèrtas occitanas.

• Totèm : Un totèm senhoreja a l’Ostal del Telh, buc de l’occitanisme orlhaqués.

• Mudason : La Calandreta del Vernhat ven de mudar dins de locals novèls. La Cloqueta a pres los calandrons jos son ala.

• Questions : Se reviscolarà un jorn lo Carnaval de la Palha per espandir la folia e l’ironia dins la vila ? Quora l’Estadi tornarà montar en Tòp 14 ?

• Balèti : E la cabreta respond a l’acordeon : en plaça per la borrèia a dos, a tres o a mila temps…