Polyphonic System (polifonia tribau a dançar)
Ah macanica, quina bona suspresa en tot escotar Polyphonic System aquera debuta deu mes de julhet a Castelnòu d’Arri, en l’encastre deu forum Euro-Region !
Devath ua petita hala e a l’òra de l’aperitiu, los quate collègas que perpausèn ua musica tribau gessida deu repertòri tradicionau deu territòri occitan, dab ua tòca : her dançar lo monde !
Mission pleada dongas per Polyfonic System, on podem arretrobar dus « istorics » de la musica occitana, dab Manu Théron (Còr de la Plana) tostemps a la punta e Ange B (Fabulous Trobadors, QDLB) arretrobat e eficaç dab la soa tecnica de Human Beat Box (quin se dit aquò en gascon?!).
Clamenç Gauthier e Henri Maquet que pòrtan tanben las loas contribucions preciosas dab flaütas, vriolons e bohas … sense nat dobte, qu’èm a la sorga de çò qui’s hé de mielhor en musica occitana !
Au cairehorc deu caminament de cadun, qu’arretrobam mes que tot l’esperit deu grop mitic Gacha Empega en çò de Polyphonic System, segon jo, dab ua tribalitat sonòra unica, mes tanben l’esperit de las tensons, combat vocau creat peus trobadors e hicats en lutz peus Fabulous Trobadors a la debuta de las annadas ueitanta.
E quin plaser de tornar véger lo noste Ange B nacionau, laguens un registre mes que tot ritmic, mes tostemps aquiu entà enviar la saussa a la canta.
Au bèth miei d’ua epòca trista e plapada de sang, Polyfonic System qu’ensaja d’arrecampar lo monde, de cantar la fraternitat ! E aquò qu’arregaudeish lo còr e l’amna !
