Palomas au horn
Dins l’istòria de la cosina nòstra, lo forn a jogat un ròtle caporal ! Lo forn es un aplech de sempre — dempuèi lo Neolitic — que dona de plan bons resultats, encara que siá electric. En Gasconha e tanben en Lengadòc, se fan còser las palombas al forn, estropadas dins qualques lescas de carnsalada. Se las palombas son joves es un succès assegurat !
Ingredients
2 palombas
4 lescas de carnsalada
pan de campanha
sagin
sal e pebre
Preparacion
Cal començar per plumar las palombas, copar lo bèc, las patas, las puntas de las alas. Puèi las cal flambuscar per dire de cremar lo gart que podriá demorar. Un còp salpebradas, las estroparem amb las lescas de carnsalada e ligarem tot amb de fial de cosina. Aquò fach, oncharem un plat que va al forn. I pausarem los aucèls e enfornarem a 200°. D’aquel temps, talharem de lescas de pan, ne cal quatre. Las rostirem. Al cap de mièja ora, los aucèls seràn còites e los tirarem del forn. Tirarem los fialses e los talharem en dos. Al mortièr, picarem lo fetge e los menuts levat lo fafièr e ajustarem aquel suc al plat, lo remenarem e n’oncharem las lescas de pan. Las daissarem dins lo plat amb las mitats de palomba sus cada lesca e servirem.
Se pòt acompanhar d’una ensalada gradalhada o d’una padenada de patanas.
Nòta
Se los aucèls son pichons ne metrem un per cap. Se pòt far tanben amb de becassas a l’ast o al forn.
