Coma pòdi èstre omofòbe ?
Coma pòdi èstre omofòbe ?
Lei questions de genre ò d’orientacion sexuala si pausan de mai en mai dins l’espaci public, dau temps que lei mentalitats evoluisson a son ritme sus aquelei subjècts. Si la pòp juguèt amb aquelei còdes tre leis annadas 70, de David Bowie a Freddie Mercury, lo demai dei genres musicaus es pas totjorn estat tant progressista. Desempuèi quauqueis annadas, lo rap s’es emparat d’aquelei questions, e tant mielhs per lo public.
Semblan luenh lei polemicas sus l’omofobia presumida d’Eminem, atudadas per son aparicion ai Grammy Awards de 2001 amb Elton John. Desempuèi, Sir Elton John explica qu’a regularament Eminem au telefòne per parlar de tot ce que pòdon partejar d’amics. En 2022 si vibra sus lo single dau britanic Central Cee, Doja, e son repic estonant : « How can I be homophobic ? My bitch is gay ». Passat lo rire, pròva que la frasa provocatritz tòca son but, lo rapper s’en explica dins mantuneis entrevistas : pòu pas èstre acusat d’omofobia, sa pichòta es bisexuala. Un pas de mai que mòstra leis avançadas d’un corrent culturau volentiers acusat de mancar de tolerància.
Si fau pasmens rampelar que Kanye West, qu’es a l’ora d’ara pas suspèct d’èstre un grand liberau, aviá ja evocat lo subjèct en 2005 sus MTV, qu’explicava èstre revengut de sei prejutjats quand son cosin èra sortit dau placard. « Mi siáu rendut compte qu’en essent omofòbe, èri contra mon cosin. Èra pas possible », disiá a l’epòca. Jay-Z tanben aviá evocat l’omosexualitat de sa maire en 2017 dins son albòm 4:44, li diant dins la cançon Smile tota son empatia, alara qu’ela aviá sofert de si dever amagar tant d’annadas. Sens necitament anar cercar de referéncias en cò dei grands noms de l’industria, en 2018, Lil Nas X aviá publicament anonciat son orientacion sexuala. Son coming out, per coratjós qu’èra estat, aviá fin finala pas fach tant de bruch, subretot qu’aviá seguit l’anóncia de Frank Ocean ; lo membre d’Odd Future aviá dich èstre bisexuau, tant coma son collèga dau meme grope Tyler the Creator. Fasiá de tot biais un brave briu que lo rap american s’atacava pas tant qu’aquò ais omos, que la question èra pas au centre de sei preocupacions. Au país de la bilheta verda, la sexualitat empacha pas lo business…
Pasmens la situacion deis Estats-Units sembla isolada. Leis artistas jamaïcans per exemple son encara ciblats per sei contenguts omofòbes quand venon en Euròpa, bòrd que dins son quite país, l’omosexualitat es encara passibla de preson, eiretatge dei vielhei leis britanicas encara en vigor sus l’iscla. D’aqueu costat de l’Atlantic, lo camin sembla encara long ; la question es jamai estada abordada sota lo signe de la tolerància, basta de si rapelar lei frasas violentas de Kery James dins Hardcore en 1998. Lo subjèct es a pena evocat per la rapaira Casey, que ditz dins una entrevista au siti madamerap.com pas tant parlar de sa condicion de frema, bòrd qu’es segon ela « un truc ibride, pas una frema ».
Mai si pòu pas acusar lo rap sonque : es bessai la societat francesa tota que sariá d’interrogar. Dins lo monde de l’espòrt, un ancian arbitre de la FFF, Nicolas Pottier, anoncièt en mai passat son omosexualitat, tot en si demandant coma leis esportius gay lo poirián assumir, alòrs que leis estadis son cafits de cants e d’injúrias omofòbes chasca setmana.
