Seleccionar una pagina

A Taula !

0 |

Lo buòu trufat

Es un rostit tipic de Sarlat, al Peiregòrd negre. Las trufas negras del Peiregòrd son las mai presadas d’Occitània. Son aromaticas e melhoran bravament totas las carns. Lo monde las sèrvan per las fèstas que, coma cadun o sap, son caras. Aqueste plat borgés pòrta de còps que i a de tròces de fetge gras, es per aquò que se fa sonque quand los convidats son plan presats e que los volètz congostar amb un bon sopar.

Ingredients

1 kg de filet de buòu d’una sola pèça

75 gr de trufas

una lesca
de carnsalada

vin blanc
aigardent

sagin

sal
pebre

Preparacion

Copar las trufas a talhons fins. Puèi cal enlardar lo filet amb la carnsalada e la trufa, salpebrar e metre dins un plat que pòsque anar al forn onchat de sagin. I ajustar un veire de vin e un veiron d’aigardent. Al forn a 180°. De temps en quora asagarem la carn amb lo chuc. Qualques minutas abans de sortir lo rostit botarem qualques trocets de trufa dins lo plat. Al cap de mièja ora o de tres quarts d’ora, sortirem lo plat, vuejarem lo chuc dins una salsièra e portarem tot en taula. Es costuma d’acompanhar lo plat amb de lescas de pan grasilhat onchadas de fetge gras.

Variantas

D’unes enlardan la carn amb de bocins de fetge gras en mai de la carnsalada e de las trufas. D’autres o fan còser a l’ast. D’autres encara cobrisson la pèça amb de lescas finas de carnsalada ligadas amb un fial de cosina. Se pòt cambiar lo sagin per de grais d’auca. Se pòt tanben aprestar una salsa en fasent rossir tres o quatre escalunhas amb un bocin de farina, s’i ajusta una mica de vin, un veiron d’aigardent, una caçada de bolhon, daissam redusir a fòc suau una ora e mièja e quand tirarem la pèça del forn, ajustarem lo chuc a la salsa, passarem tot pel colador e dins la salsièra.

A prepaus de l'autor

Vicent Marqués

Vicent Marqués i Carbonell es nascut en 1950 al País Valencian. Cosinièr de profession (ara retirat), li agrada tanben escriure, e far de recèrcas. Quaranta ans fa comencèt un trabalh antologic e istoric de la cosina occitana e catalana, un trabalh menimós fòrça documentat que qualques tòmes ne son ja sortits. Vicent escriviá ja dins Jornalet, per Lo Diari liura una recèpta, de bon far, totjorn plan rensenhada sus tot lo territòri, amb l'ajuda de Joan Tomàs.

Soscriure
M'assabentar quand
0 Comentaris
Retorns en linha
Veire totes los comentaris

M’aboni !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !