LOS CONTES DEL DRAC
Una investigacion artistica de Daidièr Mir a l’entorn del trabalh de Joan Bodon
Avèm acabat de parlar de Joan Bodon ? Nani pas ! L’autor es a l’origina de tant de camins e caminòls, de dralhas e sendarèls, que totes foguèron pas encara seguits. Aqueste còp es Daidièr Mir, artista multimèdia montalbanés que el tanben ensagèt mai d’un caminament, que se freta a l’escrivan de Roergue, e de mai d’un biais. Barrutlèt dins lo país de l’autor, ont caminèt sus las piadas dels personatges dels seus contes. D’aquò tornèt de fotografias, intemporalas e misteriosas. Puèi, un còp tornat al talhièr, ensagèt de cartografiar los luòcs descrichs per l’autor, per botar en evidéncia la tension entre las lengas d’aquel país : francés e occitan. De colatges ne nasquèron.
Qualques dessenhs e pinturas d’un format bèl venguèron puèi per donar còs als personatges : lo Drac, lo filh del diable, es evocat per d’esculturas d’oliu. L’imaginari poderós revelat pels contes es el transcrich per de monotipes sus papièr.
Un audioguida existís, que el tanben perpausa doas dralhas : una en francés per acompanhar l’espectator dins son viatge e un autre que permet d’ausir los contes dins la lenga de Bodon.
E totes aqueles camins e caminaments se rejonhon per una mòstra a l’Ostal d’Occitània de Tolosa del 8 al 27 d’octobre. Lo dijòus 10 d’octobre, lo vernissatge se farà en companhiá d’Eric Fraj, que el tanben empruntèt mai d’una dralha e que, aquel ser d’aquí, cantarà, entre autras, la poesia de Joan Bodon.
De que nos far dire que totes los camins menan a Crespinh… mas aquò’s benlèu un torn del Drac.
