Seleccionar una pagina

Umor

0 |

LA DESUMANIZACION EN CAMIN

Cada jorn, aprenèm que tecnica e monde virtual avançan e van eliminar la necessitat de tota accion umana e tota vida en societat per remandar cadun e caduna non pas a sa persona mas a sas capacitats de noirir un sistèma que sabèm pas mai se serà mestrejat per d’òmes o pels robòts qu’auràn capitat d’obténer lor independéncia (e sens referendum d’autodeterminacion). Cada còp que nais una aplicacion formidabla o una besonha inutila totalament indispensabla es un pan de las relacions umanas que cabussa dins lo non-res.

Arrestatz-vos un moment de fintar vòstre esmartfòne per faire virar (se n’avètz encara la possibilitat) vòstras tripas del cap :

– L’autre jorn, sendicalistas manifestavan a la gara de Carcassona per protestar contra l’automatizacion en camin : pas mai de portanèl de rensenhament, pas mai d’emplegat per vos vendre las bilhetas, petaçatz-vos amb las maquinas per capitar de vos i trapar dins l’ocean de las proposicions tarifàrias.

– Cal salvar lo pichon comèrci dins los vilatges. En Suèda, an comprés. Venon de dobrir un magasin-espeçariá dins un vilatjòt que i a pas de vendeire dedins. Dintras amb un còdi, crompas, escanerizas çò qu’as crompat e te chucan ta moneda (virtuala) sulpic. Endacòm, demòra (benlèu, s’es pas una maquina de reconeissença faciala) un emplegat que finta sus un ecran de contraròtle que panas pas una barra de chocolat.

– Pagar es tanben un gèste que se pèrd. Comptar las peçòtas sul comptador per crompar ton pan quotidian (lo fornièr del quartièr ven d’installar un aparelh chuca-pèça moneda !) o per i anar de ta virada d’aperitiu al cafè (s’as l’astre d’aver encara un cafè de dobèrt dins ton vilatge), las peçòtas balhadas al pichon per que se crompe un Carambar o un Malabar ; lo fregar de las bilhetas ; lo morre de las personalitats o las representacions de monuments bèls ; aquel èuro marcat sus las pèças per un camin continental e l’oblit dels francs, novèls o ancians, qu’a la fin valián pas los cinc sòus per se pagar un parelh d’esclòps. Estadi seguent : son a enlevar los distributors de moneda dins los vilatges e las vilas pichonas : aquò còsta tròp de… moneda a las bancas. Ton còfre-fòrt es ara ta carta rectangulara plastificada e las piuses que i a dessús o dins ton telefonilhet. De qué seriá lo conte d’Ali-Babà s’aviá trapat per tresaur un còdi secret o una piuse e non quaranta gèrlas d’aur, de jòias, d’òli e de Cartagèna ?

– En plaça d’anar a l’autò-escòla, de t’entatarinar amb las oras de leiçon de trapar, e ben, pòdes aprene ara de menar a distància. Probable qu’es mai aisit de faire un merlet a la jòga-estacion qu’entre doas veituras garadas long del trepador. Mas a de qué poirà servir de saber menar vist que las veituras se pilotaràn soletas (intelligentas, se dison) e aniràn ont voldràn ?

– Avèm ja perdut lo pompista que vos passava un còp de pelha sus la vitra en vos parlant del temps que farà ; deman, vendrà lo torn del factor, de la factritz, de la caissièra del supermercat, del buralista, del vesin, de la vesina, de l’òme, de la femna… E òc, 1984 es deman e es desmaterializat ! E nosaus, sèm un briconet desmoralizats…

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Alan Roch

Alan Roch foguèt institutor pendent plan de temps, avant de venir animator cultural, çò qu'explica perque consacrèt una part de son activitat a escriure pels dròlles. E a contar, qu'Alan Roch es conegut per sas istòrias inspiradas de la tradicion e de la vida del seu país (Carcassona), que salpica d'un umor ironic. Son agach agusat li val d'escriure de cronicas dins mai d'una revista o jornal, e notadament sul rugbi, que n'es un afogat de primièra borra.

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.