La còca a la bròca
La primièra question que nos ven a l’esperit es d’ont ven exactament la còca a la bròca ? D’Avairon ? Dels Pirenèus Nauts ? E a quin moment foguèt inventada ? Segon çò que se ditz, aquela recèpta vendriá dels soldats de Napoleon que l’aurián tornada de las campanhas d’Euròpa del Nòrd. Seriá nascuda en Prússia abans las annadas 1800. Podèm trobar de recèptas similaras en Ongria, en Polonha o encara en Alemanha. Mas saber s’es arribada d’en primièr en Avairon o dins los Pirenèus Nauts, aquò’s impossible d’o dire. Semblariá que siaguèsse apareguda als dos endreches sensiblament al meteis moment.
Independentament de sas originas istorica e geografica, çò que fa la particularitat de la còca a la bròca es sa forma conica eriçada de picas de pasta daurada, puslèu espectaculara, o cal ben dire ! Presentar una còca a la bròca a qualqu’un que coneis pas aquela pastissariá fa totjorn son pichon efièch.
Vos vau presentar una recèpta avaironesa de la còca a la bròca. Una recèpta transmesa de generacion en generacion. D’en primièr, pels ingredients, vos caldrà :
– 24 uòus
-1 quilograma de farina
-1 quilograma de sucre
-1 quilograma de burre
– 3 culhièrs a cafè de ròm
-2 saquets de sucre vanilhat
Per començar, vos cal desseparar los blancs e los jaunes d’uòus, abans d’ajustar lo sucre als jaunes. Vos cal far fondre lo burre e lo reservar.
D’aquel temps, vos cal montar los blancs d’uòus en nèu e lor ajustar la farina. Remenar delicatament la mèscla per que los blancs tomben pas. Tot en remenar, vos cal ajustar los tres culherats de ròm, lo sucre vanilhat, lo burre fondut e los jaunes d’uòus sucrats. Lo tot deu pausar pendent una orada.
Del temps que la pasta pausa, cal preparar lo mòtle e lo fuòc per la coseson.
Prene lo còne de fusta que va servir de supòrt a la pasta e balhar sa forma tan particulara a la còca. Vos cal metre de papièr sulfurizat a l’entorn. Manténer lo papièr sul mòtle amb de cordilhs e far passar una bròca de fèrre al dedins per lo poder téner e lo far virar al dessús del fuòc. Cal doas personas per téner cada cap de la bròca amb de gants (la bròca vendrà cremanta per causa de la calor del fuòc). Far un fuòc de lenha e installar lo còne a costat mas fòrça prèp. Aplicar la pasta sul còne tot en lo fasent virar. Cal ajustar una jaça de pasta tanlèu que la d’en dejós es pro colorada, e aquò fins a l’agotament de la pasta.
Vos cal pas doblidar de plaçar jos la còca un recipient per recuperar tota la pasta que gotejarà en virant.
La coseson dura entre 45 minutas e una ora.
Per acabar, vos cal daissar la còca refregir una ora e mièja, puèi, copar lo papièr a una extremitat e desenmotlar la còca.
La còca a la bròca se pòt tastar abans o après lo repais, amb una copa de champanhe o una crèma anglesa. N’i a que l’aiman tebesa, tot just acabada, d’autres l’aiman mai freja.
![Combatre a tot pèrdre ambe la França liura [Episòdi 2] <i class='fa fa-lock solo-premium'></i>](https://i0.wp.com/medias.lodiari.com/bunker-1569720_1920.jpg?resize=440%2C264&ssl=1)
