Seleccionar una pagina

Umor

0 |

FRANCAMENT, N’AI PAS DE BESONH !

La publicitat es una brava agression visuala, auditiva, telefonica e informatica. Las anóncias passan las termièras dels indesirables e, dins tos corrièrs del Net, te trapas fàcia a tot çò que vòls e, mai que mai, tot çò que vòls pas, sustot dins l’inutil.

Alara, francament, vos disi que n’ai pas de besonh de totas aquelas causas totalament I-NU-TI-LAS : un modèl novèl de conflaire revolucionari de ròdas de veitura ; un descalcarizador d’aiga installat per un professional ; dos meses a res-non-còsta d’assegurança auto ; 10 € de reduccion per la crompa de 45 € d’estilos ; un termomètre infraroge numeric ; vins e champanhas en venda privada a preses imbatables ; l’I-Fòne 11-prò (aparelh fòto, escran e tot e tot) ; una estampadoira novèla ; remesas dins un grand magasin parisenc ; una ofèrta pels 85 ans del jòc del Manipòli ; èsser pagat per respondre a unes sondatges ; lo placard e las panièras ont tot se recapta solet (m’estonariá !) ; las necessàrias camèras de vidèosusvelhança per mon entrepresa ; unes cotèls japoneses que trencan mai que plan (mai qu’un de La Guiòla ?) ; un apartament dins una residéncia novèla a Roen ; una cinta per susar ; 20 lamas de rasor, amb lo margue ofèrt (an pas vista ma fotografia ?) ; 2000 articles indispensables per l’òrt, lo bricolatge e l’ostal ; unas joguinas sexualas (sortida de confinhament) ; un libre fotografic personalizat ; unas cartas de visita a mon idèa ; la pausa de panèus fotovoltaïcs ; una prima per tastar còcas ; una reduccion suls solièrs esportius ; pus fòrt : aqueles solièrs en dirècte de l’usina ; la bona utilizacion de la vitamina C ; conselhs d’un engèni de l’e-servici ; 308 € d’estalvis sus mon assegurança veitura ; aspirators, netejaires e purificators d’interior (d’exterior contra lo coronavirus, n’i a pas ?) ; la pompa revolucionària pels abdominals ; una assegurança pels obsèquis ; un metòde per aprene las lengas en un res de temps (de causir entre : anglés, castelhan, alemand, italian, portugués, suedés, turc, olandés, polonés, indonesian, norvegian, danés o rus ; pas l’occitan ?) ; tornar amainatjar mon burèu a l’ostal ; magrir amb un regime sens regime (o quicòm atal) ; un investiment dins plaças de pargue d’automobilas ; ostalons pels aucelons (dins lo temps, se ba petaçavan solets !) ; l’adesiu que ba repara tot e lo demai ; un nombre illimitat de films e serias en estriming ; un prèst de moneda en linha e en quauques minutas ; unes accesòris per la piscina (qu’ai pas) ; una tondeira de pelena ; un barbacoa Napoleon ; un parasolelh-modèl novèl ; un sistèma de susvelhança informatic dobèrt sul Net mondial ; la descobèrta del patrimòni regional e dels espòrts de plena natura dins Jura ; una maquina per afranquir lo corrièr ; un difusaire a freg e per ultrasons d’òlis essencials (avets de Pirenèus e cèdres d’Atlàs) ; (ad libitum)…

E l’òme de la prada verda d’ajustar : e un ratonet ruscadièr !

Sollicitat Roch

A prepaus de l'autor

Alan Roch

Alan Roch foguèt institutor pendent plan de temps, avant de venir animator cultural, çò qu'explica perque consacrèt una part de son activitat a escriure pels dròlles. E a contar, qu'Alan Roch es conegut per sas istòrias inspiradas de la tradicion e de la vida del seu país (Carcassona), que salpica d'un umor ironic. Son agach agusat li val d'escriure de cronicas dins mai d'una revista o jornal, e notadament sul rugbi, que n'es un afogat de primièra borra.

Soscriure
M'assabentar quand
0 Comentaris
Inline Feedbacks
Veire totes los comentaris

M’aboni !

Far un don al Diari

Lo Diari, coma tota la premsa emai la premsa occitana, patís d'una situacion malaisida. Aquí vos perpausam de sosténer la cultura en occitan. Cada don compta !

Anóncia

Lo CalenDiari

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !