Seleccionar una pagina

Fotomatòn

0 |

Fotomatòn : Laurenç Labadia

Pas aisit de resumir en quauquas linhas la toa activitat. Quin e’t presentarés ?

Que soi comedian d’empont, d’arrua, de cinema, d’improvisacion, adara fòrt implicat en teatre. Que soi tanben portaire de projèctes, metedor en scèna, cronicaire ràdio… Qué mei ? Entau doblatge de filmes, que soi director artistic a Conta’m, comedian, coadaptator e formator. Que transmeti la « sciéncia de l’engana en occitan » o « quin apréner l’occitan en 5 minutas ».

Quin ès arribat a jogar en occitan ?

En 2004, lo Domenge Commet de la companhia CKC que’m perpausà Lo viatge de l’auca. Qu’èri ja comedian professionau, totun dab un pè en l’accion culturau en occitan. En 2007, l’espectacle Solexcitant que m’a hèit conéisher per carrèra peus hestaus de tota traca. Puish los corts-metratges : Lo Cho Chi Shon reperat per Canal+, l’Occitània en banhadèra… E lo collectiu Dètz, dab la vaduda deu personatge de Gorà, en julhet de 2010. Aquò qu’estó un encontre-clau. A comptar de 2011-2012, qu’èi atacat la collaboracion dab Conta’m entau doblatge de filmes en occitan. Qu’a botat pregondor en la mea istòria professionau e personau. Que’m soi encaminat de cap tà la formacion : quin crear e har crear en occitan ? Adara, que tribalhi sus un projècte de pòle regionau de ressorças entà la creacion teatrau en òc.

Qu’ès ua fòrça creativa de perpausicion, dab tostemps ua nòta d’intencion d’avança.
E’t védes com un miaire ?

Meilèu com un « mairolèr » de projècte. Que vedi sustot lo noste mestièr e consista a mancà’s un maximum de còps ! (arríders). L’umilitat qu’ei obligatòria. Lo tribalh de grop e la relacion collectiu que m’agradan hòrt. Que soi estacat a l’espandida de cadun. Aquò qu’ei un motor vertadèr. Que consideri l’occitan e pòt estar un vector d’espelida tà la societat de doman. Qu’adòri aquera lenga, aquera cultura qui son meas. Qué çò que’n hèi ? La mea responsa : crear estructuras e encastres entà sostiéner l’enveja e la creativitat.

Provocator, agitator, incontrolable…
e’t reconeishes en aqueths adjectius ?

(arríders) Quiòc, mes tostemps dab l’enveja d’amassar. Be pòt semblar paradoxau ! Qu’ei la transgression coma marca de fabrica, tà garantir ua libertat de crear. Que cau arrestar de’s préner tròp au seriós, daishar tot çò qui pòt har termièra, çò qui estreteish la pensada.

Qu’as avut la lenga occitana de familha, mes pas transmetuda directament. Qu’as sentit la vergonha e lo tabó. Quin ès, uei lo jorn, dab tot aquò ?

Que soi pertocat peu tèma de la resiliéncia. La transmission de l’emocion que va dab la transmission d’ua lenga. Que m’avisi mei anar mei de la violéncia de l’interdiccion, de la non-transmission, o de la clandestinitat de la lenga. Que mia a ua copadura de l’afeccion. Uei, que cau tornar botar enveja, desir e amor en tot açò.

A prepaus de l'autor

M’aboni !

Anóncia

Los darrièrs articles

Los darrièrs clips

Cargament...

La letra del Diari

Soscrivètz a nòstra letra d'informacions !

Soscrivètz a nòstra letra d'informacions !

Vos prepausam de vos abonar, en dos clics, a una letra regulara que vos tendrà assabentat·da de las sortidas dels novèls Diaris papièrs e de la publicacion d'articles novèls.

Avètz soscrich amb succès !