Preparacion

Coparem cap e coa de las alberginas e las lavarem jos la canèla. Las coparem per la mitat e farem d’incisions amb un cotelet tot lo long. Las metrem dins un bòl saladas e cobèrtas d’aiga. Pelarem las tomatas, las farem a tròces, las metrem dins una caçòla amb lo cabucèl e sul fòc docetament. D’aquel temps pelarem e abocinarem un parelh de grans d’alh. Al cap d’un momenton que las tomatas auràn daissat anar lor chuc, destaparem la caçòla, daissarem evaporar lo liquide, tirarem la caçòla del fòc e passarem las tomatas pel molin o pel mixer. Caldrà un rajòl d’òli dins una padena e quand l’òli serà caud i rossirem l’alh. Remenarem amb lo culhèr de fusta e i ajustarem la tomata, aquò serà salpebrat, remenat e al cap d’una estona abocarem la salsa dins una salsièra. Puèi tirarem las alberginas de l’aiga e las daissarem estorir dins un colador, las abocinarem e las rossirem dins una caçòla amb un rajòl d’òli. L’òli begut i ajustarem d’aiga sens las cobrir, salpebrarem e daissarem bulhir a fòc suau fins que i age pas mai d’aiga. Las portarem en taula amb la salsièra. Se pòdon manjar caudas o a temperatura ambienta.
Se pòt ajustar un pauquet de sucre dins la salsa.