Seleccionar una pagina

3QA

0 |

3 Questions A… Hervé Bordier

Totòm a Tolosa coneis lo Rio Loco ! Mas Hervé Bordier, que dirigiguèt lo festenal de 2011 a 2021, lo coneis segurament melhor que qual que siá. Lo breton, que cofondèt las Trans Musicales de Rennes, èra a la manòbra d’un festenal popular unic en son genre, un festenal qu’aparten a totes los Tolosans. Encontrèrem lo jove retirat per evocar qualques moments fòrts de son istòria amb Rio Loco.

LOGO_RIO-LOCO
Herve Bordier - portrait

Per l’edicion dels 20 ans de Rio Loco organizèretz una jornada « Occitània », èra vòstra volontat ?

Aviái una libertat totala sus las opcions artisticas, coneguèri doas mandaturas e degun me diguèt pas jamai « cal far aiçò o aquò ». Pels 20 ans de Rio Loco, Occitània, èra una causida de ma part, aital faguèrem Africa, Euròpa, America e Occitània. Èra vertadièrament un marcatge. Pensi qu’aquò faguèt fòrça plaser als Occitans, aquò menèt una solidaritat al festenal. Èra una fusion quasi normala entre mas rasigas bretonas e la cultura occitana. Quin plaser de descobrir de musicas, e la modernitat d’aquela cultura occitana, es aquò que m’interessava. Lo Còr de la Plana, Artús, Dupain, Cocanha… Tota Occitània èra aquí, cada artista menava sa pèira a l’edifici d’aquela jornada, dins sa diversitat. Es d’alhors lo jorn qu’amassèt lo mai de personas a l’entorn de la musica, mai de 20 000 personas i venguèron, aquò vòl dire que i aviá çaquelà un atrait.

Quina foguèt per vos l’edicion mai marcanta ?

La primièra ! En 2011, a mon arribada, èra l’annada de Mexic en França e a Rio Loco. E i aguèt un incident diplomatic entre Mexic e França, que faguèt que totes los grands eveniments foguèron anullats. L’annada de Mexic tombèt a l’aiga còpsec. Calguèt préner la decision d’anullar lo Rio Loco Mexic, perque èra precari e que las autoritats mexicanas anavan blocar, doncas calguèt tornar far la programacion, a un mes del festenal. Èra una decision politica e tecnica, sabiái qu’anàvem cap a de complicacions amb lo governament mexican per recebre los artistas, i auriá agut de pressions diplomaticas per obténer los visas e far sortir d’artistas qu’avián pas forçadament enveja de veire sortir. Èra una edicion carnièra, caduca, caliá tot tornar començar. Aquò nos permetèt d’obrir sul mond dins la diversitat. Puèi nos demandèrem en 2012 s’i caliá tornar, mas ma causida foguèt de far una autra tematica.

Qué gardatz d’aqueles 10 ans passats al cap del Rio Loco ?

Aquela valor occitana, tolosana, d’un eveniment transgeneracional. Es pro unic de realizar un festenal per de mainatges, de joves, fins als grands parents. E es pro fantastic de pas aver de cursor : festenal de joves, festenal d’aiçò o d’aquò… Aguèri un present enòrme coma director de menar un festenal sus la Prada dels Filtres, un luòc magic amb Garona en bòrd de festenal, lo Pont Nòu, lo solelh colc sus las pèiras. M’agrada tanben d’aver arrestat sus la tematica « Africa ». Longa vida a aquel festenal ! Cal que demòre, cal que los Tolosencs sián vigilants, se se comença a tocar al festenal, a çò qu’aquò venga economicament mai rendable… 5 € un tiquet d’intrada es pas car ! Aquò demòra un esfòrç de la comuna, per que contunhe d’existir un festenal important per Tolosa e Occitània.

RIO-LOCO-2022 affiche
RIO-LOCO-2021-affiche
RIO-LOCO-2015-affiche
RIO-LOCO-2019-affiche
RIO-LOCO-2016-affiche

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.

A prepaus de l'autor

Guillaume Gratiolet

Nascut en Òlt e Garona, Guillaume Gratiolet viu ara a Tolosa. Òme de mèdias, passèt per mai d'una ràdio, faguèt tanben de television, avant de s'ensajar uèi a la premsa magazine escrita dins las colomnas del Diari. "Selecta" (DJ) e animator, Guillaume es tanben un afogat de musica e de "pop culture", doas passions que parteja amb lo monde e en occitan se vos plai al dintre del projècte "Lo Clam", ont parla tan de serias tele que d'espòrt, de cinèma o de videojòcs, entre dos "esquètchs" risolents e de seleccions de cançons plan mitonadas. Quand foguèt sollicitat per far partida del còr de l'equipa del Diari, respondèt "òc" còpsec. Una evidéncia !

Soscriure
M'assabentar quand
0 Comentaris
Retorns en linha
Veire totes los comentaris

Crompar Lo Diari

Anóncia

Los pòdcasts

Los darrièrs clips

Cargament...

La letra del Diari

Òu, plan lo bonjorn ! 👋
Aquò fa plaser de te veire rebalar per aicí.

Sabes que te pòdes marcar a la letra d'informacions del Diari ? Basta d'un mail per te téner al fial de çò que pareis, magazines, articles e mai !

Pas d'espam ! Mandam 1 a 2 letras per mes, pas mai. Legís nòstra politica de confidencialitat per ne saber mai.