I a vint ans ja sortiá lo primièr volum de restitucion del trabalh de collectatge de cançons pels enfants, lo Turlututú editat per La Talvera ; lo que faguèt cantar mantunas generacions de pichons.

Aprèp qualques annadas d’espèra, vaquí qu’arriba lo segond volum ! Dins aquel album traparetz 40 cançons de creacion e 24 comptinas, formuletas e mimologismes en occitan ; creadas o adaptadas per respondre melhor a las demandas actualas en matèria de transmission de la lenga e de pedagogia.

Coma dins lo primièr volum las cançons e formulas son ordenadas per tematica en fin d’obratge, e seguisson las sasons de l’annada.

La còla de la celèbra associacion tarnesa a trabalhat per fin de los adaptar a las soscadissas e als besonhs de la vida de uèi ; i trobaretz doncas de cançons sus l’ecologia, sul circ, de cants e formulas per apasimar los enfants… Faguèron tanben una plaça mai granda al mond de l’imaginari amb de cançons escritas sus d’estructuras que se pòdon aisidament completar, o que parlan d’èssers fantastics o estranhs.

La forma a parièr evoluit, daissant mai de plaça pels comentaris e nòtas sul contengut, e mai de versions instrumentalas de las cançons son prepausadas.

De notar egalament que los musicaires trobaràn a la fin de l’obratge totas las particions, e los acòrds per poder aisidament acompanhar eles-meteisses los joves cantaires.